Investıtsııa tartý jumystaryn qaǵazben emes, ispen júrgizý kerek – Ońdasyn Orazalın
Úkimet basshysy Asqar Mamın Aqtóbe óńirine sapary kezinde ınvestıtsııa tartý jumystaryna muqııat bolýdy tapsyrdy. Osyǵan oraı oblys ákimi Ońdasyn Orazalın kásiporyn basshylary, ınvestıtsııalyq joba bastamashylarymen kezdesti. Jıyn kezinde óńir basshysynyń orynbasary Qaırat Bekenov ınvestıtsııalyq jobalar jaıly baıandady. Osy jyldyń segiz aıynda óńir ınvestıtsııasynyń ósimi 107,3% qurap, ıaǵnı, 316,3 mlrd teńge ınvestıtsııa tartylǵan. Onyń 170 mlrd teńgesi jańadan iske qosylǵan jobalarǵa tıesili. Kórsetkish respýblıka boıynsha 42% quraıdy. Ońdasyn Orazalın osy jyldyń sońyna deıin ınvestıtsııa kólemin 600 mlrd teńgege, kelesi jyly 800 mıllıardqa, 2024 jylǵa qaraı 1 trln 600 mıllıardqa jetkizýdi tapsyrdy.
«Óńirge otandyq jáne shet aımaqtan qandaı ınvestorlar kelmek, qansha jumys ornyn ashý kózdelip otyr? Bizdiń aldymyzda ekonomıkalyq potentsıaldy arttyrý, oblys bıýdjetin jańa salyq kózderimen tolyqtyrý maqsaty tur. Investıtsııa tartý jumystary qaǵazben emes, ispen júrgizilýi tıis», - dep atap ótti oblys ákimi O.Orazalın.
Keıin túrli baǵytta jumys istep jatqan kásiporyndarǵa atqarýshy organ tarapynan qoldaý kórsetý, qajetti kómek berý jumystaryn bilý maqsatynda kásipkerlerdiń oı-pikirin tyńdady. Kásiporyndardyń keıbiri jer kólemin keńeıtý, sý, jaryq máselelerine qatysty problemalarǵa tap bolyp otyrǵandyǵyn aıtty. Tipti sot oryndaýshylarynyń jumysyna kóńilderi tolmaıdy. Oblys ákimi kóterilgen jaıttarǵa qatysty orynbasary Qaırat Bekenovke mán-jaıdy anyqtap, máseleniń sheshilýine zań aıasynda yqpal jasaýdy tapsyrdy.
