Investıtsııa tartý jaǵynan 2 óńir kósh basynda tur – Indýstrııa mınıstrligi

NUR-SULTAN. QazAqparat – Búgin Úkimet otyrysynda Indýstrııalandyrý kartasy jobalaryn talqylaý kezinde QR Indýstrııa jáne ınfraqurylymdyq damý mınıstri Beıbit Atamqulov jobalardy paıdalanýǵa berý qarqyny týraly aıtty, dep habarlaıdy QazAqparat tilshisi.

«Investıtsııa tartý jaǵynan 2 óńir kósh basynda tur (699,9 mlrd teńge somasyna 28 joba). Shyǵys Qazaqstan oblysynda ınvestıtsııa kólemi 469,7 mlrd teńge bolatyn 14 jobany iske qosý josparlanyp otyr. Qaraǵandy oblysynda 14 joba iske asyrylmaq. Investıtsııa kólemi - 230,2 mlrd teńge», - dedi B. Atamqulov.

Onyń aıtýynsha, qyrkúıek aıyndaǵy jaǵdaı boıynsha jalpy somasy 296 mlrd teńge bolatyn 28 joba paıdalanýǵa berildi. 3,5 myńnan astam turaqty jumys orny ashyldy. Jobalardyń daıyndyǵy 9 óńirde 80%-dan joǵary, 6 óńirde qarqyn ortasha.

«2 óńirde (Qyzylorda oblysy men Almaty qalasynda) jobalardy paıdalanýǵa berý keshigip jatyr (tıisinshe 75% jáne 72% deńgeıinde). Nur-Sultan (3,4 mlrd teńge) jáne Almaty (8,2 mlrd teńge) qalalarynda ındýstrııalyq jobalarǵa salynatyn ınvestıtsııalar kóleminiń qala ekonomıkasyna qatysy úlesi shamaly. Sondaı-aq, Aqmola oblysyndaǵy jobalarǵa salynǵan ınvestıtsııalar 2020 jylǵy 42 mlrd teńge bolsa, bıyl 3,9 mlrd teńgege deıin túsken. ıAǵnı, 10 ese tómendegen. Bul óńirler jumysty jandandyrýy qajet», - dedi mınıstr.

Paıdalanýǵa berilgen jobalardyń ishinde mynadaı iri jobalardy atap ótýge bolady:

Birinshi joba – Qaraǵandy oblysynda «Jáırem ken baıytý kombınaty» AQ-da jumys istep turǵan óndiristi jańǵyrtý jáne baıytý fabrıkasynyń qurylysy. Kásiporyndy jańǵyrtý qorǵasyn-myrysh kenin óndirý kólemin 2,5 esege (jylyna 2 mln.tonnadan 5 mln. tonnaǵa deıin) ulǵaıtýǵa múmkindik beredi.

Ekinshi joba – «Petropavl elektr tehnıkalyq zaýyty» JShS transformatorlar óndirisi. Bul Alageým tobyndaǵy 4-shi iri zaýyt. Kásiporyndy iske qosý otandyq transformatorlar óndirisin jylyna 44 myń qýatqa qol jetkizip, 40%-ǵa (32 myńnan) arttyrady. Bul rette, eksport jylyna 25 myń birlikke (15 myń birlikten) jetedi.

Úshinshi joba – Saran qalasyndaǵy qýaty jylyna 1200 bolatyn «QazTehna» JShS Yutong jolaýshylar avtobýsyn shyǵarý. Joba iske asyryla bastaǵan kezde (2020 jylǵy jeltoqsan) oqshaýlaý deńgeıi 29% boldy. 2021 jylǵy maýsymda shaǵyn torapty óndirý ádisi (CKD) paıdalanýǵa berildi. Bul keıbir modelderdiń oqshaýlaýyn 40%-ǵa deıin arttyrady. Keleshekte Saran qalasynda shına zaýyty iske qosylsa (KamaTyres) jáne otandyq akkýmýlıatorlardy (Qaınar-AKB) paıdalanǵanda, oqshaýlaý deńgeıi 50%-ǵa deıin jetýi tıis. Bul avtobýstar Bilim jáne ǵylym mınıstrligimen birlesip ótkiziletin «Balalardy mektep avtobýstarymen tasymaldaýdy uıymdastyrý» jol kartasy aıasynda paıdalanylady.

Budan buryn habarlanǵandaı, bıyl elimizde 1,23 trln teńge bolatyn 128 joba iske qosylady.