Investıtsııa tartý baǵytyndaǵy Qazaqstannyń ozyq óńirleri ataldy
ASTANA. QazAqparat - «Kazakh Invest» UK» AQ basqarma tóraǵasy Saparbek Tuıaqbaev shetelden ınvestıtsııa tartý baǵytynda belsendi jumys júrgizip jatqan óńirlerdi atady, dep habarlaıdy «QazAqparat» HAA tilshisi.
«Jalpy ınvestıtsııa týraly aıtatyn bolsaq, sońǵy 26 jylda ınvestıtsııalardyń úshten ekisi munaı-gaz salasyna tıesili bolyp kelgen. Sondyqtan Qazaqstannyń batys óńirinde ınvestıtsııa kólemi joǵary. Árıne, Astana men Almaty qalalary bizdiń negizgi megapolıstar bolǵandyqtan, bul jerde de shıkizattyq emes ınvestıtsııalardyń basym bóligi salynýda. Basqa oblystardy qaraıtyn bolsaq, qazirgi tańda Ońtústik Qazaqstan, Pavlodar, Qaraǵandy, Shyǵys Qazaqstan sekildi óńirlerde belsendilik artyp kele jatyr», - dedi «Kazakh Invest» basshysy Úkimet otyrysynan keıin baspasóz ortalyǵynda ótken jıynda.
Saparbek Tuıaqbaevtyń aıtýynsha, Soltústik Qazaqstan oblysynyń bul baǵyttaǵy kórsetkishi tómendeý eken.
«Álbette, onyń obektıvti sebepteri bar. Soltústik óńirler tek aýyl sharýashylyǵy salasynda astyqqa táýeldi. Basqa da ónerkásip salasyn qarastyrsaq, bıznestiń damý deńgeıi tómen bolǵandyqtan, bul jerde joba sany kóp emes. Biraq, barlyq ákimdikter belsendi jumys júrgizip jatyr. Biz sońǵy 2-3 aıda tyǵyz jumys jasadyq. Ortaq josparlarymyz bar. Sol sebepti, jyl sońyna deıin óńirler deńgeıindegi ınvestıtsııa tartýdaǵy belsendilikti arttyrýdy retteımiz dep kózdep otyrmyz», - dep túıdi Saparbek Tuıaqbaev.
