Investıtsııa ósimi 15,1% jetti - Úkimet otyrysy

NUR-SULTAN. QazAqparat – Jyldyń toǵyz aıynda taý-ken óndirý ónerkásibinen tys kapıtalǵa ınvestıtsııalardyń ósý qarqyny 15,1% boldy. Úkimet otyrysynda toǵyz aıdaǵy ekonomıkanyń ósimi týraly esep bergen QR Ulttyq ekonomıka mınıstri Áset Erǵalıev osyndaı derekter keltirdi, dep habarlaıdy QazAqparat tilshisi.

«Ekonomıkalyq ósýdiń mańyzdy faktory ishki jáne syrtqy ınvestıtsııalardy tartý bolyp otyr. Onyń ishinde qomaqty ınvestıtsııalardy óndirýshi emes salalarǵa tartý baıqalýda.

Jyldyń toǵyz aıynda taý-ken óndirý ónerkásibin esepke almaǵanda negizgi kapıtalǵa ınvestıtsııalardyń ósý qarqyny 15,1% qurady.

Investıtsııa qurylys salasynda – 1,3 ese, óńdeý ónerkásibinde – 80,6%, saýdada – 37,8%, aýyl sharýashylyǵynda – 36,7%, aqparat jáne baılanysta – 14,3%, jyljymaıtyn múlikpen operatsııalar salasynda –18,9% jáne qarjy salasynda – 15,6% ósti», - dedi Áset Erǵalıev.

Onyń málimeti boıynsha, óńirler arasynda eń joǵarǵy kórsetkish Shymkent, Almaty qalalarynda jáne Aqtóbe, Soltústik Qazaqstan oblystarynda baıqalyp otyr.

«Bıylǵy qańtar-tamyzda syrtqy saýda taýar aınalymy 62,8 mlrd AQSh dollaryn, onyń ishinde eksport boıynsha kórsetkish 37,5 mlrd AQSh dollaryn qurady. Bul rette, óńdelgen taýarlar eksporty 23,2% artyp, 12,1 mlrd AQSh dollaryna deıin jetti», - dedi mınıstr.