Investıtsııa, aqparattandyrý jáne ındýstrııalyq-ınnovatsııalyq saıasat máseleleri týraly zań jobalary qaraldy
ASTANA. QazAqparat - Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń Úkimeti men Serbııa Respýblıkasynyń Úkimeti arasyndaǵy Investıtsııalardy ózara kótermeleý jáne qorǵaý týraly kelisimdi ratıfıkatsııalaý týraly» zań jobasy qaraldy.
2010 jyly 7 qazanda Astanada qol qoıylǵan Kelisim saýda-ekonomıkalyq ózara qatynastardy keńeıtýge jáne yntalandyrýǵa, ınvestıtsııany kótermeleýge jáne qorǵaýǵa baǵyttalǵan.
Qujatqa sáıkes, Qazaqstan men Serbııa ulttyq zańnamalar jáne Dúnıejúzilik saýda uıymy qaǵıdalarynyń negizinde erkin saýda tártibin ornyqtyrady. Taraptar ınvestorlar úshin barynsha qolaıly jaǵdaı jasaýǵa mindettenedi. Investıtsııalyq qyzmetti júzege asyrýǵa qajetti vızalar men ruqsattardy berý úshin qolaıly jaǵdaı jasalatyn bolady.
Sondaı-aq komıtet «Aqparattandyrý týraly» zań jobasyn da qarady. Qujat halyqaralyq standarttarǵa jaýap bere alatyn aqparattandyrýdyń tıimdi júıesin engizý maqsatynda ázirlengen bolatyn. Onda kommýnıkatsııalyq ınfraqurylymnyń quqyqtyq, uıymdastyrý men qorǵaýdyń tehnıkalyq sharalary belgilengen. Aqparat júıesin, «elektrondy úkimet» tuǵyrnamasyn, qyzmet kórsetýdiń baǵdarlamalyq ónimin attestatsııalaý tártibi retteledi.
Zań jobasynyń erejeleri memlekettik jáne memlekettik emes aqparat júıesine talaptardy, olardyń ózara is-qımyly men qorǵalýyna talaptardy bekitedi. Sonymen birge derekterdiń saqtalýyna, rezervtik kóshirmesin jasaý tetikterine, aqparattardyń kezeń-kezeńimen muraǵattalýyna, «elektrondy úkimet» quramyna engen memlekettik baza men derekter bazasyna zańsyz qol jetkizýdi boldyrmaýǵa erekshe nazar aýdarylady.
«Qazaqstan Respýblıkasynyń keıbir zańnamalyq aktilerine aqparattandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda qaraldy.
Zań jobasynyń maqsaty zańnamany qabyldanyp otyrǵan «Aqparattandyrý týraly» zań erejelerimen sáıkes keltirý bolyp tabylady.
Zań jobasyna sáıkes, 39 zańnamalyq aktige, onyń ishinde 9 kodekske ózgerister men tolyqtyrýlar engiziledi. Máselen, Azamattyq kodeks jazbasha mámileni elektrondyq nusqada jasaý múmkindigin qarastyrady. Ákimshilik quqyq buzýshylyq týraly kodekstegi aqparattandyrý, elektrondyq qujattardaǵy jáne elektrondyq tsıfrlyq qoltańba týraly zańnamanyń buzylýyna qatysty erejeler jetildiriledi. Birqatar zańdarǵa elektrondy qujat aınalymy máseleleri boıynsha túzetýler kózdelip otyr.
Odan basqa, komıtet «Qazaqstan Respýblıkasynyń keıbir zańnamalyq aktilerine ındýstrııalyq-ınnovatsııalyq saıasat máseleleri boıynsha ózgerister men tolyqtyrýlar engizý týraly» zań jobasyn birinshi oqylymda qarady.
Zań jobasy qolaıly ınvestıtsııalyq ahýaldy qalyptastyrý, energııa servıstik qyzmetter naryǵyn damytý, týrızm ındýstrııasyn odan ári júıeli damytý maqsatynda ázirlengen bolatyn.
Qujatpen ındýstrııalyq-ınnovatsııalyq qyzmet sýbektileri úshin ınvestıtsııalyq jobalardy iske asyrý kezinde paıdalanylatyn shıkizattar jáne materıaldardy ımporttaý kezinde salyqtyq jáne kedendik preferentsııa kózdeledi. Іri transulttyq kompanııalardyń qatysýymen birlesken kásiporyndar qurý jónindegi derbes klasterlik qordyń (ınnovatsııalyq tehnologııalar parki basqarý organynyń) ókilettikterin keńeıtý usynylady. Óndirýshilerge qaldyqtardy jınaý, saqtaý, óńdeý jáne ónimdi tutyný quramy joıylǵannan keıin paıda bolǵan qaldyqtardy joıýǵa baılanysty qosymsha mindettemeler júkteledi.
Zań jobalary Palatanyń qaraýyna jiberildi.
