Invataksı men shıpajaı qyzmetteriniń shyǵynyn óteý tártibi ózgerdi
ASTANA. KAZINFORM — Qazaqstanda múgedektigi bar adamdarǵa kórsetiletin ınvataksı jáne sanatorıı-kýrorttyq emdeý qyzmetteriniń shyǵynyn óteý qaǵıdalary jańartyldy, dep habarlaıdy Kazinform tilshisi.
Qazaqstan Respýblıkasy Eńbek jáne halyqty áleýmettik qorǵaý mınıstriniń 2026 jylǵy 26 mamyrdaǵy buıryǵyna sáıkes, qyzmet kórsetýshiler shot-faktýralardy elektrondyq shot-faktýralar júıesi arqyly elektrondy túrde, sondaı-aq qaǵaz nusqada rásimdeıdi. Bul rette qujatta kepildendirilgen soma men qosymsha tólem mólsheri «qosymsha málimetter» bóliminde mindetti túrde jeke kórsetilýi tıis.
Ýákiletti organ «E-sobes» avtomattandyrylǵan tsıfrlyq júıesine kelip túsken qujattardy jeti jumys kúni ishinde qaraıdy. Osy merzim aıaqtalǵannan keıin shyǵyndardy óteý týraly sheshim qabyldanady nemese qujattar sebepteri kórsetilip, tolyqtyrý úshin keri qaıtarylady.
Sondaı-aq múgedektigi bar adamdar men múgedektigi bar balalardy jeke abılıtatsııa jáne ońaltý baǵdarlamasyna (JAOB) sáıkes sanatorıı-kýrorttyq emdeýmen qamtamasyz etý tártibi naqtylandy.
Ótinishterdi «Azamattarǵa arnalǵan úkimet» memlekettik korporatsııasy, jergilikti atqarýshy organdar, elektrondyq úkimet portaly nemese abonenttik nómir arqyly berýge bolady. Al proaktıvti qyzmet kórsetilgen jaǵdaıda ótinish berý talap etilmeıdi.
Ótinish tirkelgennen keıin málimetter avtomatty túrde «E-sobes» júıesine engiziledi. Azamattarǵa sanatorıı-kýrorttyq qyzmet kórsetýshini tańdaý qajettigi nemese qyzmet kórsetý barysy týraly SMS-habarlamalar joldanady.
Eger belgilengen merzim ishinde qyzmet kórsetýshi tańdalmasa, tańdaý múmkindigi ýaqytsha shektelýi múmkin. Keıin bul múmkindik portal arqyly qaıta qalpyna keltiriledi.
Sonymen qatar memlekettik organdardyń tsıfrlyq júıeleri arasynda avtomatty túrde derekter almasý tártibi qarastyrylǵan. Atap aıtqanda, «E-sobes», «Múgedektigi bar adamdardyń ortalyqtandyrylǵan derekter banki» jáne elektrondyq úkimet portaly ózara yqpaldasady.
Buıryqta ótinishterdi qaraý merzimderi, ótinish berýshilerdi habardar etý tártibi, qujattardy qaıtarý jáne kezekke qoıý jaǵdaılary da naqty reglamenttelgen.
Qujat 2026 jylǵy 12 shildeden bastap qoldanysqa engiziledi.
Buǵan deıin 2026 jyldyń basynan beri múgedektigi bar adamdar agregatorlar arqyly ınvataksı qyzmetine 150 myńnan astam tapsyrys bergenin jazǵanbyz.
