Invataksı qyzmetin kórsetý qaǵıdalary ózgerýi múmkin

ASTANA. KAZINFORM — Kólik mınıstriniń «Avtomobıl kóligimen (ınvataksı) múgedektigi bar adamdardy tasymaldaý jóninde qyzmetter kórsetý qaǵıdalaryn bekitý týraly» buıryq jobasy jarııa talqylaýǵa shyǵaryldy.

Joba «Avtomobıl kóligi týraly» Zańnyń 13-babynyń 23) tarmaqshasyna sáıkes daıyndalǵan.

Buıryq jobasy ınvataksı qyzmetine muqtaj azamattardy anyqtaý máselelerin naqtylaýǵa baǵyttalǵan.

- Atap aıtqanda, qoldanystaǵy qaǵıdalardyń 23-tarmaǵynyń 1) jáne 2) tarmaqshalarynda kózdelgen kórsetilimderi joq adamdar úshin ınvataksı qyzmetin kórsetýge arnalǵan krıterıılerdi belgileý usynylady. Bul túzetýler múgedektigi bar adamdardyń belgili bir sanattaryn ınvataksı qyzmetimen qamtamasyz etý múmkindigin keńeıtýge múmkindik beredi, - delingen vedomstvo dereginde.

Ázirleýshilerdiń málimetinshe, ózgerister ınvataksı qyzmetin kórsetýge arnalǵan kórsetkishterge qatysty normalardy jetildire túsedi.

Buıryq jobasy qabyldanǵan jaǵdaıda, onyń nátıjeleri resmı jarııalanǵan kúnnen bastap 10 kúntizbelik kún ótken soń kúshine enedi dep josparlanyp otyr.

Qujatty qabyldaý áleýmettik-ekonomıkalyq, quqyqtyq nemese ózge de teris saldarǵa ákep soqpaıdy.

Buıryq jobasy 2026 jylǵy 14 qańtarǵa deıin qoǵamdyq talqylaýda bolady.

Aıta keteıik, jyl basynan beri múgedektigi bar adamdar ınvataksı qyzmetin 352 myń ret paıdalandy.