Invataksı qyzmetin alý talaptary jańartylýy múmkin
ASTANA. KAZINFORM — Qazaqstanda múgedektigi bar azamattarǵa kórsetiletin ınvataksı qyzmetin jetildirý máselesi talqylandy. QR Eńbek jáne halyqty áleýmettik qorǵaý mınıstri Asqarbek Ertaev múgedektigi bar balalardyń ata-analarymen jáne qoǵamdyq birlestikter ókilderimen keńeıtilgen jumys kezdesýin ótkizip, ınvataksı qyzmetin alýǵa negiz bolatyn medıtsınalyq kórsetilimder tizbesin ázirleý máselesin qarastyrdy. Bul týraly vedomstvonyń baspasózó qyzmeti málim etti.
Kezdesýge sondaı-aq QR Parlamenti Májilisiniń depýtaty Dınara Naýmova, Densaýlyq saqtaý vıtse-mınıstri Álııa Rústemova, memlekettik organdardyń beıindi departamentteriniń ókilderi qatysty. Dıalogty mundaı formatta ótkizýge qoǵamdyq uıymdardyń kóptegen ótinishteri negiz boldy.
— Talqylaý barysynda múgedektigi bar balalardyń ata-analaryna qandaı aýrýlar men buzylystar kezinde múgedektigi bar jandar ınvataksı qyzmetin alýǵa shynymen muqtaj bolatyny jóninde egjeı-tegjeıli túsindirmeler berildi, sonyń ishinde arbamen (kreslo-arbamen) qozǵalǵan jaǵdaıda arnaıy beıimdelgen kólikpen tasymaldaý máselesi de qamtyldy, — delingen habarlamada.
Kezdesýge qatysýshylar Densaýlyq saqtaý mınıstrligimen birlesip daıyndalǵan medıtsınalyq kórsetilimderdiń jańartylǵan tizbesin talqylady. Invataksı qyzmetin paıdalaný quqyǵyn berý týraly sheshimderdi medıtsınalyq qorytyndylar negizinde dárigerlik-konsýltatsııalyq komıssııalar qabyldaıdy.
Talqylaý barysynda osy qyzmetti qarjylandyrý tetikterine jeke nazar aýdaryldy. Eńbek jáne halyqty áleýmettik qorǵaý mınıstri Asqarbek Ertaev ınvataksı qyzmetin paıdalaný quqyǵyn beretin nozologııalar tizbesin jańartý ony alýshylar sheńberin keńeıtýdi kózdeıtinin habarlady. Bul rette qyzmetti jergilikti atqarýshy organdar jergilikti bıýdjetterde kózdelgen qarajat sheginde usynady.
— Eńbek jáne halyqty áleýmettik qorǵaý mınıstrligi múgedektigi bar adamdardy ınvataksımen tasymaldaý boıynsha qyzmetter kórsetý qaǵıdalaryn negizgi ázirleýshi retinde Kólik mınıstrligine buıryq jobasyna engizý úshin usynystardy jibergeni atap ótildi. Aldaǵy ýaqytta qujat múddeli memlekettik organdarmen jáne ákimdiktermen kelisý rásiminen ótedi, — dep habarlady vedomstvodan.
Aıta keteıik, byltyr múgedektigi bar jandar ınvataksı qyzmetine 490 myńǵa jýyq tapsyrys berdi.