Invataksı qyzmeti Astana men Almatyda qanshalyqty suranysqa ıe

Eńbek jáne halyqty áleýmettik qorǵaý mınıstrligi múgedektigi bar adamdar úshin kedergisiz orta qalyptastyrý jónindegi jumysty jalǵastyryp keledi. Sonyń bir baǵyty — ınvataksı qyzmetin damytý.

Bul qyzmet múgedektigi bar adamdarǵa qala ishinde erkin ári yńǵaıly júrýge múmkindik beredi. Arnaıy kólikpen jumysqa, oqýǵa, medıtsınalyq jáne ońaltý ortalyqtaryna barýǵa bolady. Osylaısha azamattardyń kúndelikti ómirge belsendi aralasýyna jaǵdaı jasalady.

— Qazir ınvataksı qyzmetin paıdalaný da jeńildeı tústi. Kólikke tapsyrys berý kezinde uzaq kútýdiń jáne artyq qujat rásimdeýdiń qajeti joq. Qyzmet kórsetý júıesine zamanaýı tsıfrlyq sheshimder engizilip, tanymal taksı servısterimen yqpaldastyq jolǵa qoıylǵan. Bıyl 1 qańtar men 31 shilde aralyǵynda Astana men Almatyda ınvataksı 251 myńnan astam saparǵa qyzmet kórsetti, — delingen mınıstrlik taratqan aqparatta.

Astanada bul qyzmetti kúndelikti paıdalanatyndar kóp. Olar ınvataksımen jumysqa, bilim alýǵa, medıtsınalyq jáne ońaltý ortalyqtaryna baryp júr.

Jeti aıdyń ishinde elordada 934 adam ınvataksı qyzmetin paıdalanyp, jalpy 211 916 sapar jasaǵan. Al 2026 jyldyń shilde aıynyń ózinde erekshe qajettiligi bar 735 elorda turǵyny 25 282 ret ınvataksı qyzmetine júgingen.

Almatyda da qyzmetti paıdalanýshylardyń sany joǵary. Jyl basynan beri 1 512 adam 39 802 sapar jasaǵan. Shilde aıynda 838 almatylyq 5 166 ret ınvataksı qyzmetin paıdalanǵan.

Invataksı qyzmetiniń damýy múgedektigi bar adamdar úshin qajetti jerge ýaqytynda jetýge, kúndelikti sharýalaryn óz betinshe atqarýǵa jáne qoǵam ómirine belsendi aralasýǵa múmkindik berip otyr.

Eńbek mınıstrligi aldaǵy ýaqytta da áleýmettik qoldaý sharalaryn tsıfrlandyrý jáne múgedektigi bar adamdarǵa qajetti qyzmetterdi qoljetimdi etý baǵytyndaǵy jumysty jalǵastyra beredi. 

Osyǵan deıin ınvataksı men shıpajaı qyzmetteriniń shyǵynyn óteý tártibi ózgergenin jazǵanbyz.