Intuitive Machines kompanııasynyń «Athena» modýli Aıǵa qondy
ASTANA. KAZINFORM — Hıýstondyq Intuitive Machines kompanııasy jasaǵan ekinshi kommertsııalyq aı modýli Aıdyń ońtústik polıýsi mańyna qondy, dep habarlaıdy CBS News.
IM-2 ǵarysh apparaty, ıaǵnı Intuitive Machines kompanııasynyń «Athena» modýli segiz kún buryn SpaceX Falcon 9 zymyranymen ushyrylǵan bolatyn.
«Athena» ózimen birge kúrdeli ǵylymı quraldardy, eki shaǵyn roverdi, uıaly baılanysqa arnalǵan tájirıbelik jabdyqty jáne arnaıy «hopper» qurylǵysyn alyp ushty. Bul qurylǵy qoný modýliniń mańynda bir núkteden ekinshi núktege sekirý úshin ázirlengen.
Aldyn ala boljam boıynsha, modýl Aıdyń ońtústik polıýsinen shamamen 100 mıl qashyqtyqta qonǵan.
Dıspetcherler ǵarysh kemesiniń negizgi qozǵaltqyshy óshirilgenin, onyń kún panelderi elektr qýatyn óndire bastaǵanyn jáne qoný modýliniń borttyq kompıýteri Jermen baılanysta ekenin, komandalardy qabyldap jatqanyn rastady.
Alaıda, Djonson atyndaǵy ǵarysh ortalyǵynyń mamandary qoný modýliniń ınertsııalyq ólsheý blogynan (IMU) málimet túskenin habarlady. Ol boıynsha «Athena» modýli búıirine aýnap túsken.
Qoný sáti osydan týra bir jyl buryn Aıǵa jetken Intuitive Machines kompanııasynyń alǵashqy «Odysseus» modýlinen keıin oryn aldy. Ol da qoný tiregi isten shyǵyp, búıirine qulaǵan bolatyn.
Buǵan deıin SpaceX kompanııasynyń Starship megazymyranynyń taǵy bir sátsiz ushyrylymy týraly habarlanǵan edi. Bul jańa zymyrandardy ázirleý barysynda ekinshi ret qatarynan oryn alǵan apat boldy.