Intımdi foto taratamyn: Semeı turǵyny áıelden aqsha bopsalaǵan

SEMEI. QazAqparat – Semeı qalasy turǵynynyń ıntımdi fotosyn taratamyn dep 1 mln teńge suraǵan adam 4 jylǵa túrmege qamalýy múmkin, dep habarlaıdy QazAqparat tilshisi.

Abaı oblystyq Polıtsııa departamenti baspasóz qyzmetiniń málimetine súıensek, uıymdasqan qylmysqa qarsy kúres basqarmasynyń qyzmetkerleri áıel adamnan aqsha bopsalaǵan Semeı qalasynyń turǵynyn ustady.

«Belgili bolǵandaı, ol shilde aıynyń ortasynan bastap tanysynyń ıntımdik fotolaryn taratamyn dep, 1 mln teńge bopsalap kelgen. Tergeý barysynda odan 150 000 teńge tárkilendi», - deıdi basqarma bastyǵynyń orynbasary Áset Shahantaev.

Qazir atalǵan fakti boıynsha QR Qylmystyq Kodeksiniń 194-baby 1-bóligimen (Bopsalaý) sotqa deıingi tergeý amaldary júrgizilip jatyr. Kúdikti 4 jylǵa deıingi merzimge bas bostandyǵynan aıyrylýy múmkin.

Eske salsaq, osyǵan deıin Abaı oblysynda balany ańdyǵan er adamnyń áreketi tekserilgeni habarlanǵan.