«Intervıdenıe» halyqaralyq án baıqaýyna 21 el qatysady

ASTANA. KAZINFORM — «Intervıdenıe-2025» halyqaralyq án baıqaýynyń fınaly 20 qyrkúıekte Máskeýdegi Live Arena sahnasynda ótedi. Bul týraly baıqaý uıymdastyrýshylarynyń baspasóz qyzmeti habarlady, dep jazady Kazinform agenttiginiń tilshisi.

Oqıǵaǵa BRIKS, TMD, Latyn Amerıkasy, Azııa, Afrıka aımaqtarynan jáne AQSh-tan barlyǵy 21 eldiń oryndaýshylary qatysady.

Qatysýshylardyń jańartylǵan tizimine Kenııa, Madagaskar jáne Efıopııa qosyldy. Al aldyn ala qatysatyny habarlanǵan Ázerbaıjan men Birikken Arab Ámirlikteri ishki sebepter men daıyndyqqa ýaqyttyń jetispeýine baılanysty baıqaýdan bas tartty.

Qatysatyn elderdiń qatarynda Belarýs, Venesýela, Vetnam, Mysyr, Úndistan, Qazaqstan, Qatar, Qytaı, Kenııa, Kolýmbııa, Kýba, Qyrǵyzstan, Madagaskar, Reseı, Saýd Arabııasy, Serbııa, AQSh, Tájikstan, Efıopııa, Ózbekstan jáne Ońtústik Afrıka Respýblıkasy bar.

— BRIKS, TMD, Latyn Amerıkasy, Azııa jáne Afrıkadan jáne AQSh-tan 20-dan astam eldiń qatysýshylary mýzyka arqyly birigip, álemniń mádenı baılyǵy men ártúrliligin kórsetedi, — dedi Reseı Prezıdentiniń qoǵamdyq jobalar basqarmasynyń basshysynyń orynbasary Aleksandr Jýravskıı.

Ol «Intervıdenıe» mádenı jáne qoǵamdyq mánge ıe ekenin, halyqaralyq dıalog pen ózara túsinistikti nyǵaıtýǵa arnalǵan alań bolatynyn atap ótti.

Baıqaý qatysýshylarynyń óner kórsetý reti «Rossııa» ulttyq ortalyǵynda ótetin jerebe tartý arqyly anyqtalady. Sondaı-aq baıqaýda 25-ten astam eldiń jýrnalısteri qatysatyny aıtyldy.

Buǵan deıin «Evrovıdenıe-2026» baıqaýy qaıda ótetini naqtylandy.