«Intervıdenıe-2025» baıqaýynda Qazaqstandy Ámire men 8 jasar Jasmın tanystyrady

ASTANA. KAZINFORM – 20 qyrkúıekte ótetin «Intervıdenıe-2025» halyqaralyq án baıqaýynda Qazaqstan atynan ánshi Ámire men segiz jasar Jasmın Qaıratqyzy óner kórsetedi, dep habarlaıdy uıymdastyrýshylar.

Bıylǵy baıqaýda 23 eldiń oryndaýshylary baq synaıdy. Kontsertti tórt qurlyqta tikeleı efırde kórýge bolady, al qatysýshy memleketterdiń telearnalary bir táýlik ishinde jazbasyn kórsetedi.

Qazaqstandyq delegatsııany Ernar Sadyrbaev, ıaǵnı Ámire tanystyrady. Ol Saıat Raqymjanovtyń sózine jazylǵan «Dala tańy» ánin oryndaıdy. Ánshi – «Slavıan bazary» halyqaralyq baıqaýynyń jeńimpazy ári «Daryn» memlekettik syılyǵynyń laýreaty.

Ánshige sahnada segiz jasar Jasmın Qaıratqyzy qosylady. Ol – qazaqstandyq delegatsııadaǵy eń jas qatysýshy. Jasmın bul rólge júzden astam úmitkerdiń arasynan iriktep alynǵan.

Nómirdiń tolyq mazmuny qupııa saqtalýda, alaıda uıymdastyrýshylar onyń áserli ári erekshe bolatynyn atap ótti.

«Bul án barlyq qatysýshylardyń júregin jaýlap aldy. Olar áýenin qosylyp aıtyp júr. Eń basty maqsatymyz – onyń Qazaqstanda hıtke aınalyp, Otanǵa degen súıispenshilikti dáripteıtin patrıottyq ánderdiń aldyńǵy qatarynan oryn alýy», – dedi qazaqstandyq delegatsııanyń bas prodıýseri Altynbek Rahmetov «Eýrazııa» birinshi arnasyna bergen suhbatynda.

Ámireniń ózi de baıqaýǵa erekshe úmitpen qatysyp otyrǵanyn jetkizdi.

«Maǵan qyzyǵy – bir-birimen baılanysy joq 20-dan astam eldiń kórermenderi qalaı daýys beredi. Bul ádil nátıjege jeteleıdi dep oılaımyn», – dedi ol.

Bıylǵy baıqaýda Brazılııadan dýet Lýsıaný Kalazansa men Taıs Nader, Belarýs elinen ánshi Anastasııa Kravchenko da óner kórsetedi. Sońǵysy Qazaqstannyń nómirin «áserli jáne júrekke jetetin týyndy» dep baǵalady.

«Intervıdenıe-2025» baıqaýynyń fınaly 20 qyrkúıekte saǵat 22:30-da «Eýrazııa» birinshi arnasynda kórsetiledi.

Aıta keteıik, buǵan deıin Reseıde ótetin halyqaralyq baıqaýda Qazaqstan atynan kim óner kórsetetinin jazǵan bolatynbyz.