Interpol qarjy pıramıdasyn qurdy dep kúdikke ilikken azamatty Ispanııadan ekstradıtsııalady
ASTANA. KAZINFORM – QR Bas prokýratýrasynyń jáne ІІM-niń qyzmetkerleri Syrtqy ister mınıstrliginiń kómegimen qylmystyq jaýapkershilikke tartý úshin Ispanııa Koroldiginen qarjy pıramıdasynyń qyzmetine baılanysty transulttyq uıymdasqan topqa qatysqany úshin kúdiktini ekstradıtsııalady. Bul týraly QR Bas prokýratýrasynyń baspasóz qyzmeti habarlady.
Ol 2016-2017 jyldar aralyǵynda zańsyz materıaldyq paıda kórý maqsatynda basqa elderdegi adamdar tobymen «Questra Holding» kompanııasyn qurdy degen kúdikke ilingen.
Qylmyskerler qarjy pıramıdasyn ár túrli elderdiń aýmaǵynda kedergisiz taratý maqsatynda ınternet jelilerde salymshylardy kóbirek tartý úshin kompanııanyń oıdan shyǵarylǵan ınvestıtsııalyq portfelderin satý týraly aqparat ornalastyrylǵan veb-saıttar ashqan.
Bul top 800-den astam azamatty aldap, 1 mıllıard teńgeden astam shyǵyn keltirgen.
Atalǵan fakti boıynsha sotqa deıingi tergep-tekserý bastalyp, kúdiktiler halyqaralyq izdestirýge jarııalanǵan.
2022 jyldyń jeltoqsanynda Bas prokýratýranyń ekstradıtsııalyq suraýy boıynsha izdeýdegilerdiń biri Ispanııa aýmaǵynda ustaldy.
Qazir ol Astanadaǵy tergeý ızolıatoryna qamaldy.
Atalǵan qylmysty jasaǵany úshin múlkin tárkilep, 10 jyldan 15 jylǵa deıingi merzimge bas bostandyǵynan aıyrý túrindegi jaza qarastyrylǵan.
Ustalǵandy ekstradıtsııalaý Qazaqstan Respýblıkasy men Ispanııa Koroldigi arasyndaǵy ustap berý týraly 2012 jylǵy 21 qarashadaǵy sharttyń bolýyna baılanysty múmkin boldy.
