Interpol adam saýdasyna qarsy operatsııa barysynda 160-qa jýyq kúdiktiniń ustalǵanyn habarlady

ASTANA. KAZINFORM — Adam saýdasyna qarsy baǵyttalǵan aýqymdy halyqaralyq operatsııa nátıjesinde keminde 158 kúdikti ustaldy, dep habarlaıdy TASS.

Interpoldyń baspasóz habarlamasynda kórsetilgendeı, tergeý barysynda qylmystyq áreketke qatysy bar degen kúdikpen taǵy 205 adamnyń tulǵasy anyqtalǵan.

— Operatsııaǵa 43 elden 15 myńǵa jýyq quqyq qorǵaý organdarynyń qyzmetkeri qatysty. Olardyń qatarynda polıtsııa, shekarashylar, eńbek ınspektorlary, sondaı-aq salyq jáne keden qyzmetiniń mamandary bar, — delingen Interpol málimdemesinde.

Onda «Ǵalamdyq shynjyr» dep atalǵan operatsııa 2025 jylǵy 1-6 maýsym aralyǵynda Aýstrııa men Rýmynııanyń quqyq qorǵaý organdarynyń jetekshiligimen ótkendigi aıtylady. Operatsııany úılestirý jáne qoldaý jumystaryn Interpol, Eýropol jáne Eýropanyń shekara men jaǵalaý kúzeti agenttigi (Frontex) júrgizgen.

Tergeýshilerdiń habarlaýynsha, operatsııa barysynda 64 eldiń azamaty bolǵan 1194 qurban anyqtalǵan. Olardyń kópshiligi Rýmynııa, Ýkraına, Kolýmbııa jáne Qytaı azamattary. Sonymen qatar operatsııa kezinde 278 myń eýroǵa jýyq qolma-qol aqsha, jalǵan qujattar, esirtki zattary men atys qarýlary tárkilengen.

Aıta keteıik, buǵan deıin Interpol qazaqstandyq qyzdy Kambodjadaǵy eńbek quldyǵynan qutqaryp qalǵanyn jazdyq.