Internettiń úsh aıǵa óshetini ras pa: mamandar túsindirdi
ASTANA. KAZINFORM — Áleýmettik jelilerde 17 qarashadan bastap ınternet úsh aıǵa jappaı óshiriledi degen aqparat tarady. Tótenshe jaǵdaılar mınıstrligi men Kıbershabýyldardy taldaý jáne tergeý ortalyǵy bul qaýesetke qatysty túsinik berdi.
Mundaı jazbalardyń avtorlary jappaı hakerlik shabýyldar jasalyp, bank júıeleri buzylýy múmkin ekenin, sonyń saldarynan shottardaǵy aqsha joǵalýy yqtımal ekenin eskertedi. Osyǵan baılanysty turǵyndarǵa azyq-túlik, aýyzsý jáne qolma-qol aqsha jınap qoıýǵa keńes bergen.
Tótenshe jaǵdaılar mınıstrligi mundaı qaýip týraly eshqandaı eskertý taratpaǵanyn málimdedi.
Al Kıbershabýyldardy taldaý jáne tergeý ortalyǵy ártúrli deńgeıdegi kıberqaýipter únemi bolatynyn atap ótti. Alaıda 17 qarashada ınternet óshiriledi degen aqparat resmı derekkózder arqyly rastalmaǵan.
— Bizdińshe, bul — áleýmettik jelilerde ilip áketip, keńinen taratyp jibergen kezekti konspırologııalyq habarlama, — deıdi mamandar.
Ortalyq mamandary ınternet, serverlik ınfraqurylym, baılanys jáne bank júıeleri bir ǵana «tetikten» basqarylatyn ortaq júıe emes ekenin túsindirdi. Olardyń árqaısysy kóptegen operatorlar men uıymdardyń jelisine bólingen.
Sondyqtan bir júıede aqaý paıda bolýy nemese oǵan shabýyl jasalýy qalǵan júıelerdiń bári avtomatty túrde isten shyǵady degendi bildirmeıdi. Jekelegen aýqymdy nemese ýaqytsha shekteýler bolýy múmkin. Alaıda barlyq júıeniń bir mezette tolyq óshýi — óte kúrdeli ári yqtımaldyǵy tómen stsenarıı.
Mamandardyń aıtýynsha, mundaı aqparattyq arandatýlar áleýmettik jelilerde qaralym jınaý úshin taratylýy múmkin. Keı jaǵdaıda onyń maqsaty — halyq arasynda dúrbeleń týǵyzý nemese qoldanýshylardy alaıaqtyq shemalarǵa tartý.
Kıbershabýyldardy taldaý jáne tergeý ortalyǵy ókilderi osyndaı aqparatty belgisiz avtorlardyń jazbalaryna senip qabyldamaı, tıisti memlekettik organdardyń, kompanııalar men basqa da uıymdardyń resmı arnalary arqyly tekserýge keńes beredi. Ásirese, jazba kóp qaralym men pikir jınaǵan jaǵdaıda da aqparattyń ras-ótirigin anyqtaǵan jón.
