“Internettiń qazirgi álemi” áleýmettik jobasynyń ekinshi kezeńi bastaldy

dep habarlaıdy QazAqparat.

Qazaqstan jastary kongresimen birlesip ótkizetin bul sharanyń basty maqsaty Qazaqstan oqýshylarynyń ınternet saýattalyǵyn arttyrý. Joba aıasynda elimizdiń jalpy bilim berý mektepterinde oqýshylardy ınternettiń múmkindikteri men dúnıejúzilik jelige kirýdiń mobıldi tásilderimen tanystyrýǵa baǵyttalǵan ashyq sabaqtar ótkiziletin bolady.

«Eger de buryndary bazalyq bilim oqý, jazý jáne sanaý daǵdylaryn qajet etse, qazirgi kezde olardyń qataryna kompıýter men ınternet jelisin bilýdi de qosýǵa bolady. Sondyqtan «Internettiń qazirgi álemi» jobasyn tek áleýmettik baǵdarlama retinde ǵana emes, bolashaqqa baǵyttalǵan ınvestıtsııa dep qarastyrý qajet», deıdi Qazaqstan jastary kongresiniń atqarýshy dırektory Nurlan Sydyqov. Al «KaR-Tel» kompanııasynyń qoǵammen baılanys qyzmetiniń jetekshesi Pavel Rodınniń aıtýynsha, álemniń kóshbasshy elderimen salystyrǵanda Qazaqstanda ınternet jelisiniń taralýy tómen deńgeıde. Ǵalamtordyń aqparattyq qorynyń múmkindikterin elimizdiń turǵyndarynyń 16 paıyzy ǵana paıdalanyp júr. «Olardyń 80 paıyzynda búkilálemdik jelige shyǵýdyń múmkindigi bar. Sebebi olar Beeline jelisiniń taralýy aýmaǵynyń turǵyndary retinde mobıldi ınternet múmkindigin paıdalana alady. Biz jastardy jelige mobıldi túrde kirý múmkindikteri jóninde qulaǵdar etip, osylaısha respýblıkadaǵy aqparattyq alshaqtyqty joıýǵa óz úlesimizdi qosýǵa kúsh salmaqpyz», deıdi P. Rodın.

Jalpy «Internettiń qazirgi álemi» jobasynyń birinshi kezeńi 2009 jyldyń mamyr aıynda Qostanaı men Oral qalalaryndaǵy mektepterde ótkizilgen edi. Onda joǵarǵy synyptyń 18 myń oqýshysy qamtylǵan bolatyn. Bıylǵy jyly ashyq sabaqtarǵa respýblıkanyń 8 aımaǵynyń orta mektepteriniń 147 300 oqýshysy qatysady dep josparlanýda.