Internetti shýlatqan Astanadaǵy úılený toıy kortejiniń júrgizýshilerine aıyppul salyndy - VIDEO
ASTANA. QazAqparat - Búgin Internette jas jubaılar mingen kortejdi vıdeoǵa túsirý úshin jol erejelerin buzyp, joldyń qarsy baǵytyna shyqqan, sondaı-aq, taǵy da zańǵa qaıshy áreket - artymen júrgen kólikterdiń vıdeosy jarııalanǵan bolatyn. Oqıǵa Astana qalasynyń ortalyq kóshesi - sol jaǵalaýdaǵy D.Qonaev kóshesinde oryn alǵan. Elordanyń Іshki ister departamenti jol júrý erejesin buzǵan júrgizýshilerdi taýyp, olarǵa aıyppul salynǵanyn habarlaıdy.
Astana qalalyq Іshki ister departamentine qarasty Jedel basqarý ortalyǵynyń beınekameralary arqasynda toı kortejiniń júrgizýshileri, jol erejesin buzǵan kólikterdiń sany anyqtalǵan eken. Astana qalalyq ІІD Ákimshilik polıtsııa basqarmasy jol-patýrldik polıtsııasynyń ınspektorlary jol erejesin óreskel buzǵan júrgizýshilerdi taýyp, ákimshilik jaýapkershilikke tartty.
Anyqtalǵandaı, kortej júrgizýshileri Ákimshilik quqyq buzýshylyq kodeksiniń 596-baby, 3-tarmaǵyn (joldyń qarsy betine shyǵý), Kodekstiń 596-baby, 2-tarmaǵyn (jol qatarlarynan shyǵý), Kodekstiń 595-baby, 2-tarmaǵyn (kólikti artymen júrgizý), Kodekstiń 590-baby, 2-tarmaǵyn (kóliktiń memlekettik tirkeý belgisin alyp tastaý) buzyp, oılaryna kelgenin jasaǵan. Osy baptarmen qatar, kortej júrgizýshilerine sıgnal bergenderi úshin Kodekstiń 593-baby, 1-tarmaǵyna saı aıyppul salynǵan.
«Jol erejesin buzǵan azamattardyń týǵan-týystaryn ákimshilik jaýapkershilikke tartý úshin eshqandaı negiz joq», - dep atap ótken ІІD baspasóz qyzmeti.
