Internettegi «ınvestıtsııa»: ІІM kúmándi jobalarǵa aqsha salmaýǵa shaqyrdy
ASTANA.KAZINFORM — Polıtsııa azamattardy áleýmettik jelilerde, messendjerlerde jáne ınternette usynylatyn kúmándi ınvestıtsııalyq jobalarǵa aqsha salmaýǵa shaqyrady.
Alaıaqtar kóbine ózin broker, ınvestıtsııalyq kompanııanyń qyzmetkeri nemese qarjy mamany retinde tanystyrady. Olar «joǵary tabys», «kepildi paıda», «táýekelsiz ınvestıtsııa» dep ýáde beredi.
Ádette, aldymen az mólsherde aqsha salýdy suraıdy. Arnaıy jalǵan saıt nemese qosymsha arqyly aqshańyz kóbeıip jatqandaı kórsetedi. Osydan keıin «taǵy aqsha salyńyz», «komıssııa tóleńiz», «shotyńyzdy ashý úshin qarajat qajet» degen syltaýlarmen qosymsha aqsha talap etedi.
Al aqshany qaıtaryp alǵyńyz kelgen kezde saıt jumys istemeı qalady, akkaýnt buǵattalady nemese «keńesshi» baılanysqa shyqpaı qoıady. Nátıjesinde adam óz qarajatynan aıyrylýy múmkin.
Alaıaqtardyń qurbany bolmaý úshin:
- «100% kepildengen joǵary tabys» degen ýádege senbeńiz;
- qysqa ýaqytta aqshańyzdy birneshe ese kóbeıtýdi usynatyndarǵa saq bolyńyz;
- sizdi asyqtyryp, birden aqsha salýǵa kóndiretin adamdarǵa senbeńiz;
- beıtanys adamdardyń nusqaýy boıynsha aqsha aýdarmańyz;
- bank kartasynyń derekterin, CVV kodyn jáne SMS arqyly kelgen kodtardy eshkimge aıtpańyz;
- kúmándi siltemelerge ótpeńiz jáne belgisiz qosymshalardy júktemeńiz.
ІІM ınvestıtsııa salmas buryn usynystyń zańdylyǵyn jáne kompanııa týraly aqparatty muqııat tekserýge, kúmándi usynystarǵa aqsha aýdarmaýǵa úndedi.
Buǵan deıin ІІM qarjy qyzmetkerlerine jańa alaıaqtyq shemasy týraly eskertken bolatyn.
