Internettegi alaıaqtardan qalaı qorǵanýǵa bolady
ASTANA. KAZINFORM – «Zań men tártip» tujyrymdamasy aıasynda ІІM Tergeý departamenti ınternet-alaıaqtyqtyń aldyn alý maqsatynda aptalyq shara ótkizdi, dep habarlaıdy Polisia.kz.
Іs-shara barysynda bilim berý jáne densaýlyq saqtaý uıymdarynda, áskerı bólimderde, halyq kóp shoǵyrlanatyn oryndarda jáne Halyqqa qyzmet kórsetý ortalyqtarynda túsindirý jumystary júrgizildi.
Azamattarǵa eń jıi kezdesetin kıberqylmys túrleri týraly aqparat berildi. Onyń ishinde aldyn ala tólem arqyly jasalatyn jalǵan ınternet-saýda, jalǵan ınvestıtsııalyq jobalar, sondaı-aq bankter men quqyq qorǵaý organdarynyń atynan jasalatyn alaıaqtyq qońyraýlardyń qaýiptiligi túsindirildi.
Mamandardyń keńesi boıynsha, beıtanys adamdarǵa jeke derekterdi bermeý, tek senimdi ınternet-resýrstardy paıdalaný, kúdikti siltemeler men qosymshalardan aýlaq bolý qajet.
Sonymen qatar qupııasózderdi júıeli túrde jańartyp, bank shottaryndaǵy qozǵalystardy turaqty baqylap otyrý usynylady.
Aıta keteıik, Almatyda kıber alaıaqtardyń áreketi toqtatyldy.