Internette jalǵan aqparat taratqandarǵa qansha aıyppul salynady

ASTANA. KAZINFORM — Mádenıet jáne aqparat vıtse-mınıstri Qanat Ysqaqov áleýmettik jelilerde jáne onlaın-platformalarda jalǵan aqparat jarııalap, taratqandarǵa salynatyn aıyppul kólemin atady.

«Onlaın-platforma qoldanýshylary jalǵan aqparat taratqan jaǵdaıda ákimshilik jaýapqa tartylady. Árıne, aqparattyń jalǵan ekeni dáleldengen soń. Naqty aıtsaq, jeke tulǵalar úshin 10-20 aılyq eseptik kórsetkishten bastalady, al zańdy tulǵalarǵa 100 AEK-ke deıin aıyppul qarastyrylǵan. Qaıtalanǵan jaǵdaıda tutqyndalýy da múmkin», — dep túsindirdi Qanat Ysqaqov Astana Media Week is-sharasy barysynda BAQ ókilderiniń saýalyna jaýap bere turyp. 

Buǵan deıin vıtse-mınıstr blogerlerdiń BAQ ókili retinde tirkelip, qyzmet ete alatyndyǵyn aıtqan edi. 

Aıta keteıik, elordada Astana Media Week aptalyǵy bastaldy.

Dástúrli sharanyń bıylǵy taqyryby — «Medıanyń áseri jáne tsıfrlyq úndestik».