Internette «jalańash» fotony taratýǵa qandaı jaýapkershilik qarastyrylǵan
ASTANA. QazAqparat - Internette «jalańash» fotosýretterdi taratý Qazaqstan zańnamasy boıynsha usaq buzaqylyq nemese jeke ómirge qol suǵý retinde qarastyrylýy múmkin, dep habarlaıdy QazAqparat.
QR Іshki ister mınıstrligi «QazAqparat» tilshisiniń resmı saýalyna bergen jaýabynda atap kórsetkenindeı, bul - fotony kim taratqanyna baılanysty.
Óziniń «jalańash» sýretterin jelige salý Qazaqstanda 10 AEK kóleminde aıyppul nemese 10 táýlikke deıin qamaýǵa alý jazasyna alyp kelýi yqtımal. Eger ol bir jylda ekinshi márte qaıtalansa, buzaqy 15 táýlikke qamalady. Degenmen ákimshilik qamaýǵa ilikpeıtin azamattar sanaty da bar. Olar: 14 jasqa deıingi balany tárbıelep otyrǵan áıelder, 18 jasqa deıingi balalar, 1 jáne 2 toptaǵy múgedekter, sonymen qatar 58 jasqa deıingi áıelder men 63 jasqa deıingi erler.
Eger fotosýretti ózge azamat salǵan bolsa, oǵan 5 jylǵa deıin bas bostandyǵynan aıyrý jáne 2-den 5 jylǵa deıin belgili laýazymdyq qyzmet jáne belgili bir qyzmet túrlerimen aınalysýǵa tyıym salynady.
Eger fotosýret óziniń qyzmettik babyn paıdalaný arqyly nemese paıda kórý maqsatynda arnaıy qurylǵylardyń arqasynda alynǵan bolsa, qylmystyq jaýapkershilik qarastyrylǵan (QR Qylmystyq Kodeksiniń 147-baby).
Eske sala keteıik, jaqynda Astanada kóliginiń janynda jalańash túsken fotosýretin jelige salyp jibergen jergilikti azamatshaǵa 22 690 teńge aıyppul salyndy. Sot onyń qylyǵyn qoǵamdyq tártipti buzý dep baǵalap, ony jazyqty dep tapty. Qyzdyń ózi bolsa, fotony onyń jigiti baıqaýsyzda taratyp jibergenin aıtqan bolatyn.
