Internette táýlik boıy monıtorıng júrgizemiz – Іshki ister mınıstri

ASTANA. KAZINFORM – Elimizde kıberqylmysqa qarsy kúres departamenti jumys isteıdi. Mamandar ınternet jelisine táýlik boıy monıtorıng júrgizip, zańsyz saıttardy buǵattaıdy. Osy baǵyttaǵy jumys týraly tolyǵyraq Іshki ister mınıstri Erjan Sadenov aıtyp berdi.

- Balalardy qorǵaý memlekettik saıasat pen mınıstrliktiń negizgi jumys baǵyty. Búginde tehnologııa ómirdiń ajyramas bóligine aınaldy. Árıne, tehnologııa, ınternet bilim alýǵa, qarym-qatynas qurýǵa sheksiz múmkindik beredi. Degenmen ınternettiń qaýpi de bar, ony búgin kórip otyrmyz, ol zańsyz jáne zııan kontentter, ıaǵnı destrýktıvti ıdeologııa, sýıtsıdtik baǵyttaǵy oıyndar, kıberbýllıng, qýdalaý, bopsalaý, alaıaqtyq, esirtki satý taǵy basqa qylmystarǵa tartý qoljetimdi bolyp otyr, - dedi Erjan Sadenov elordada ótken jasóspirimderdiń onlaın qaýipsizdigine arnalǵan is-sharada.

Mınıstrdiń aıtýynsha, vedomstvo ınternettegi zańsyz ári zııan kontenttermen kúndelikti kúresip jatyr. 

- Bul álemdik problema. Biz múddeli organdarmen birlesip kúresip jatyrmyz. Naqty aıtqanda, ınternet resýrstardyń ákimshiligi, ata-analar, memlekettik jáne quqyq qorǵaý organdary bul máseleni sheshýge belsendi qatysý kerek. Bizdiń mınıstrlik óz kezeginde júıeli sharalar qabyldap jatyr. Birinshiden, kıberqylmysqa qarsy kúres departamentin qurdyq, ınternet jelisine táýlik boıy monıtorıng júrgizemiz, zańsyz saıttardy buǵattap jatyrmyz, - deıdi vedomstvo basshysy. 

Búgin elordada Qazaqstanda Teen Accounts-tiń iske qosylýy jáne jasóspirimderdiń onlaın qaýipsizdigi taqyrybynda kezdesý ótti. Іs-sharaǵa Іshki ister mınıstri, Mádenıet jáne aqparat mınıstrliginiń ókili, Tsıfrlyq damý, ınnovatsııalar jáne aeroǵarysh ónerkásibi mınıstri (onlaın), Balalar quqyǵy jónindegi ýákil jáne Meta ókilderi qatysty. 

Bıyl sáýirde Qazaqstan Meta-men zııatkerlik menshik, avtorlyq quqyq boıynsha tájirıbe almasatyny týraly jazǵan edik.