Internette Shyǵys Qazaqstannyń biregeı tabıǵaty týraly vıdeo jarııalandy
ASTANA. QazAqparat - Shyǵys Qazaqstan oblysy Semeı qalasynyń turǵyny Andreı Şetının Facebook-tegi óz paraqshasynda Shyǵys Qazaqstannyń - Altaıdyń biregeı tabıǵaty týraly vıdeo jarııalady, dep habarlaıdy QazAqparat tilshisi.
«Shyǵys Qazaqstannyń tabıǵaty. ShQO-ǵa saıahat. Maýsym, 2017», - dep jazdy Andreı Şetının.
Eske salsaq, qystygúni ol Shyǵys Qazaqstan oblysy Prırechnoe aýylyndaǵy qar tonnelderi týraly vıdeo ornalastyrǵan bolatyn.
Shyǵys Qazaqstan oblysy úlken týrıstik áleýetke ıe - óńirdiń tabıǵaty ózinshe erekshe ári áralýan - ór Altaıdyń shyńdary, eldegi eń tunyq sýy bar - Marqakól, tánge şıpa Alakól, Tarbaǵataı men Jońǵar Alataýynyń jotalary, Qazaqstandaǵy eń úlken ózen - Ertis, qaraǵaı ormany. ShQO-da şıpajaılar men pantymen emdeý oryndary óte kóp.
Búginde Berel, Shilikti qorǵandary, «álem keremetteri» qataryna jatqyzýǵa bolatyn Muztaý (ony «Tıbettegi qasıetti oryndarmen» salystyrady jáne kóptegen adamdar taýdyń tek ShQO jaǵynan ǵana táý etedi) týraly kóptegen derekter málim. Degenmen, «jer kindigi» dep te atalatyn bul ólkeniń beımálim tustary jeterlik.
Flora men faýnasy asa baı, 34 paıyz bóligin ormandy alqaptar quraıtyn Katonqaraǵaı memlekettik ulttyq tabıǵı parki týrısterde tańdanys týdyrmaı qoımaıdy.
Taskesken - Baqty jolyndaǵy qorǵannan saq zamanyndaǵy patsha qyzdyń múrdesi tabylǵany belgili. Ǵalymdar oǵan «Úrjar hanshaıymy» degen ataý berdi. Ol - áıgili Esik qorǵanyndaǵy Altyn adamnan keıingi soǵan uqsas ekinshi eskertkish. «Úrjar hanshaıymy» eskertkishi bizdiń jyl sanaýymyzǵa deıingi IV-ІІІ ǵasyrlarǵa tıesili.
Al Semeı jerinde tanymal saıahatshylar Djordj Kennan, P.P.Semenov - Tıan-Shanskıı, P.S. Pallas jáne kórgen-bilgenderi jóninde qyzyqty maǵlumattar qaldyrǵan ózge de tulǵalar bar.
Bul jerde saıası jer aýdarylǵandar, óńirdi zerttep-bilýge súbeli úlken qosqan Reseıdiń zııaly qaýym ókilderi turdy, olar - M. Dostoevskıı, E. P.Mıhaelıs, N.ıA. Konshın, N.I.Dolgopolov jáne kóptegen basqalary.
XX ǵ. basynda halqymyzdyń azamattyq tarıhyndaǵy eń uly ulttyq ıdeıa - Alash ıdeıasy bolsa, onyń alǵashqy irgetasy - qazaq ıdeologııasynyń temirqazyǵy bolyp, Alash qaıratkerleri Álıhan Bókeıhanov, Ahmet Baıtursynov, Mirjaqyp Dýlatov, Júsipbek Aımaýytovtyń qolymen Semeıde qaǵyldy, bostandyq pen táýelsizdiktiń týy Semeıde tigildi.
Búginde Shyǵys Qazaqstan oblysynda joldar jóndelip, týrısterge kórsetiletin qyzmetterdiń servısin jaqsyrtý jumystary qolǵa alynýda. Osy aptada ótken Úkimet otyrysynda Premer-Mınıstr Baqytjan Saǵyntaev Alakóldiń joǵary týrıstik áleýetin atap óte kele, kól bir maýsymda 2 mln týrıst qabyldaı alatynyn atap ótken bolatyn.
