Internette dıssertatsııa jazatyn jarnama tolyp júr - senator
«Internetke kirip «doktorlyq nemese kandıdattyq dıssertatsııany satyp alý» dep terip qalyp edim, 46 sekýndttyń ishinde osyndaı qyzmetti usynatyn 3300 nátıje shyǵa keldi. Zakaz-kz saıtynyń ishinde tipti «ýaqytyńyzdy únemdep, kerekti dıssertatsııany alasyz, ony biliktiligi joǵary mamandar jazady» dep, baǵasyna deıin kórsetilgen. Tipti sol ǵylymı jumystardy jasaǵan adamdardy maqtaý sózderine deıin salyp qoıypty. Bul baǵytta plagıat kóbeıip, sapa tómendep ketti. Al Qazaqstannyń ǵylymy týraly maqala ınternette óte az. Osyny qalaı shekteımiz?» - dep surady depýtat Bilim jáne ǵylym vıtse-mınıstri Sholpan Qarınovadan.
Bul suraqqa jaýap bergen vıtse-mınıstr bul máseleden Bilim jáne ǵylym mınıstrligi habardar ekenin málim etti.
«Qazir bul problemaǵa monıtorıng jasap otyrmyz. Bilim jáne ǵylym mınıstrligi jyl saıyn qabyldanyp jatqan normatıvti-quqyqtyq qujattar ǵylymı uıymdardyń ózine, ǵylymı ataq alý tártibine qoıylatyn talaptardy taldaýǵa baǵyttalǵan. Buǵan deıin qandaı sharýalar atqaryldy? Plagıat jáne ǵylymı qyzmetkerlerdiń moıyndalýy turǵysynan birqatar talap kúsheıtildi. Ǵylymı qyzmetkerler arasynda bul máseleni keńinen talqyladyq. Málimetterdi qarap otyrsaq, jyl saıyn doktorantýrǵa bólinetin granttar sany 2 myńdy quraıdy. Odan bólek óz qarajatymen túsetin adamdardyń sany 200-den asady. Shamamen osynyń ishinde 200-ge tarta ǵylymı eńbek baǵalanyp, olardy jazǵan adamdarǵa ǵylymı ataqtar berilip jatyr», - dedi ol.
Vıtse-mınıstr osylaısha talaptardy kúsheıte otyryp, ǵylymı eńbekterdiń aldymen sheteldik jýrnaldarda moıyndalýyna mańyz beriletinin atap ótti.
«Eńbektiń aǵylshyn tilinde jarııalanýyn da talaptardyń biri etip aldyq. Sebebi álemdegi ǵalymdar da bir máseleni zertteý kezinde osy eńbekterdi oqı alatyndaı bolýy kerek», - dedi ol.
