Internette balaǵat sóz aıtqandarǵa 86 myń teńge aıyppul engizilmek
ASTANA. KAZINFORM – Internette balaǵat sóz aıtqandarǵa 86 myń teńge aıyppul engizilmek. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Qazaqstan Respýblıkasy Ákimshilik quqyq buzýshylyq týraly kodeksiniń (budan ári – ÁQBtK) 434-babyna sáıkes, qoǵamdyq oryndarda balaǵat sóz aıtý, jeke tulǵalarǵa tıisý jáne aınalasyndaǵylarǵa qurmetsizdik bildiretin, qoǵamdyq tártip pen azamattardyń tynyshtyǵyn buzatyn ózge de osyndaı áreketter usaq buzaqylyq sanalady jáne ákimshilik jaýaptylyqqa ákep soǵady. Mundaı áreketter úshin 20 aılyq eseptik kórsetkish mólsherinde aıyppul salý nemese 20-dan 60 saǵatqa deıingi merzimge qoǵamdyq jumystarǵa tartý ne 5 táýlikten 15 táýlikke deıin ákimshilik qamaqqa alý kózdelgen, - dedi Úkimet basshysy jaýabynda.
Onyń atap ótýinshe, qazirgi ýaqytta «Qazaqstan Respýblıkasynyń Ákimshilik quqyq buzýshylyq týraly kodeksine onlaın-platformalar jáne buqaralyq aqparat quraldary máseleleri boıynsha ózgerister men tolyqtyrýlar engizý týraly» zańnyń jobasy ázirlendi.
- Zań jobasynda ÁQBtK-niń joǵaryda atalǵan 434-babyna tolyqtyrý engizý arqyly onlaın-platformalarda balaǵat sózder qoldanǵany úshin ákimshilik jaýaptylyq belgileý kózdelgen, - dedi Oljas Bektenov.
Buǵan deıin Almatyda qoǵamdyq orynda balaǵat sózder aıtyp, beınejazba jarııalaǵan sheteldik jazalanǵan edi.
