Internette arandatýshylyq aqparat taratqany úshin jaýapqa tartýdy zańmen bekitýdi oılastyrý kerek — Prezıdent

ASTANA. KAZINFORM — Jyl saıyn elimizde 20 myńnan astam ınternet-alaıaqtyq faktisi tirkeledi. 

Osy oraıda Prezıdent Qasym-Jomart Toqaev Úkimetke quqyq qorǵaý organdarymen jáne qarjy salasyn retteýshilermen birge azamattardyń jeke derekterin qorǵaýdy meılinshe qamtamasyz etýdi tapsyrdy.

Onyń aıtýynsha, jappaı tsıfrlandyrý memlekettiń azamattarmen jáne bıznes ókilderimen qarym-qatynasyn aıtarlyqtaı jeńildetedi. Sondaı-aq bıýrokratııany jáne sybaılas jemqorlyq qaterlerin azaıtady.

− Bul túsinikti. Alaıda, taıaqtyń eki ushy bar, tsıfrlandyrý damyǵan saıyn alaıaqtyq kóbeıip barady. Qoǵamdyq pikirge teris yqpal etý, bıliktiń bedelin túsirý jáne el ishinde alaýyzdyq týdyrý úshin jalǵan málimet taratyp, aqparattyq shabýyl jasaý beleń alýda. Mundaı áreketter azamattardyń qaýipsizdigine jáne eldegi turaqtylyqqa úlken qater tóndiredi. Sondyqtan ınternet-platformalarda arandatýshylyq sıpatta aqparat taratqany úshin jaýapkershilikke tartýdy zańmen bekitý máselesin oılastyrý kerek, − dedi Prezıdent Úkimettiń búgingi keńeıtilgen otyrysynda.

Prezıdent atap ótkendeı, biraq kıberqaýipsizdikti kúsheıtý sharalary tsıfrlandyrý úderisine tosqaýyl bolmaýǵa tıis.

− Qoǵamda memlekettiń azamattardy kıberalaıaqtardan qorǵaý úshin qabyldap jatqan sharalary nátıjesiz degen qasań pikir qalyptasyp keledi. Statıstıka da kóńil kónshitpeıdi. Jyl saıyn 20 myńnan astam ınternet-alaıaqtyq faktisi tirkeledi. Qylmystyń 80 paıyzǵa jýyǵy áshkerelenbeıdi. Sondyqtan Úkimet quqyq qorǵaý organdarymen jáne qarjy salasyn retteýshilermen birge azamattardyń jeke derekterin qorǵaýdy meılinshe qamtamasyz etýi kerek, − dedi Memleket basshysy.

Buǵan deıin Qasym-Jomart Toqaev Úkimet pen ulttyq kompanııalar jasandy ıntellekt tehnologııasyn engizýdi qolǵa alýdy tapsyrǵan edi.