Internetim istemeı qalatyn kez sırek - Baǵdat Mýsın

Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın ınternet istemeı qalǵanda qandaı shara qoldanatynyn aıtyp berdi, dep habarlaıdy Kazinform tilshisi.

«Baǵdat Batyrbekuly, siz qandaı uıaly baılanys operatoryn qoldanasyz? Sizde ınternet istemeı qalatyn, uıaly baılanysyńyz ustamaıtyn jaǵdaı jıi bola ma?» degen suraq qoıdy tilshiler Úkimette ótken baspasóz máslıhatynda.

«Men eki uıaly baılanys operatoryn qoldanamyn, 2 sim-kartam bar. Birinshiden, bul tekseris jumystaryn júrgizýge yńǵaıly. Ekinshiden, kóbine jumysta bolamyn. Sondaı-aq úıde de negizinen wi-fi qoldanamyn. Sondyqtan jalpy mundaı úlken problemaǵa tap bolmaımyn. Biraq ondaı másele týyndaǵanda tıisti ótinishpen bizdiń radıomonıtorıng júrgizetin mekemege júginemin. Sol mekemeni jiberemin. Olar sondaǵy aqaýdy ólshep, sol ólshem boıynsha (uıaly baılanys operatoryna – red.) aıyppul salady», - dep jaýap berdi mınıstr.

Sondaı-aq mınıstr operatorlarmen sol jerdegi sapasyz ınternet máselesin sheshý boıynsha jumys isteıdi.

Buǵan deıin Baǵdat Mýsın azamattardyń derbes derekterin qorǵaý úsh baǵytta júrgizilip jatqanyn aıtqan edi.