Interneti joq turǵyn úıler paıdalanýǵa berilmeıdi – Baǵdat Mýsın
«Jalpy búginde baılanys sapasyn qadaǵalaýǵa múmkindik beretin normatıvtik aktiler bar. Eger sıgnaldyń bir bóligi ustap tursa, standartqa sáıkes, baılanys bar ekenin bildiredi. Árıne, bul baılanystyń ınternette sapaly jumys isteýge jáne qyzmetterdi paıdalanýǵa jetkiliksiz ekenin túsinemiz. Sondyqtan qazir bizde eki másele bar. Internet sapasyna qoıylatyn naqty talaptar joq jáne el boıynsha qaı jerde jaǵdaı múshkil, qaı jerde ınternet bar ekeni jóninde saraptama joq», - dedi mınıstr Ortalyq kommýnıkatsııalar qyzmetinde ótken brıfıngte.
Onyń aıtýynsha, ınternettiń sapasyn baqylaý men máselelerdi sheshý úshin eki jol tańdalǵan. Birinshisi – «Baılanys bar» halyqtyq baqylaý servısi.
«Bul servıste kez kelgen paıdalanýshy bir batyrmany basý arqyly bizdiń derekqorǵa jyldamdyq týraly derekterdi tirkeı alady. Bul bizge belgili bir aımaqtaǵy derekterdi berýdiń jyldamdyǵy men koordınattaryn beredi. Tıisinshe, osy derekterdiń barlyǵyn jınap, respýblıkadaǵy jaǵdaıdy baqylap otyrmyz. Servıs osylaı jumys isteıtin bolsa, biz arnaıy qurylǵylarymen álsiz sıgnaldy túzetý men aıyppul salý quqyǵy bar kontrolerlerimizdi qaıda jiberý keregin bilemiz. Bul sizderdiń shaǵymdaryńyzǵa jaýap berýge múmkindik beredi jáne aqparat negizinde máseleni joıý boıynsha josparly jumys júrgize alamyz», - dep túsindirdi B. Mýsın.
Sonymen birge, spıker retteýshi rólin odan ári kúsheıtý qajettigin atap ótti.
«Pandemııa muny qadaǵalaýsyz qaldyrmaý qajettigin kórsetti. Baqylaýdy kúsheıtý úshin ınternet sapasyna qoıylatyn talaptardy kúsheıtemiz. Sondaı-aq, radıojıilikterdi bólý standarttary boıynsha da jumys júrgizilýde. Bul bizge latafýndızmmen kúresýge kómektesedi. Úshinshi usynys – aıyppul mólsherin arttyrý. Tórtinshi – turǵyn úı keshenderin optıkalyq arnalarsyz paıdalanýǵa berýge tyıym salynady. Muny ınfraqurylymdyq damý mınıstrligine usyndyq jáne kelise aldyq», - dedi Baǵdat Mýsın.
