Interneti joq eldi mekendegiler onlaın aýyl sharýashylyǵy sanaǵyna qalaı qatysady

ASTANA. KAZINFORM — Erteńnen bastap aýyl sharýashylyǵy ónimin óndirýshiler, baý-baqsha egip, úıde mal ustaıtyn sharýalar ulttyq sanaqty bastaıdy.

Bul týraly Ulttyq statıstıka bıýrosy basshysynyń orynbasary Ásel Sháýenova málim etti. 

— 1 tamyz kúni saǵat 00:00–de sanaq.gov.kz saıtyndaǵy saýalnamany toltyrý múmkindigi bar. Ol úshin eGovMobile qosymshasynan ETsQ, SMS nemese QR-kod arqyly avtorızatsııa jasaý qajet. Tirkeý kezinde rastaý kody kórsetilgen elektrondyq poshtaǵa nemese telefonǵa jiberiledi. Bıýro qyzmetkerleri telefon shalý arqyly habarlaspaıdy jáne eshqashan tórt tańbaly kodty suramaıdy, — dedi Ásel Sháýenova ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, sanaq.gov.kz saıtynda saýalnamanyń eki nusqasy bar, biri — aýyl sharýashylyǵy óndirýshileri úshin, ekinshisi — baý-baqsha nemese mal ustaıtyn úı sharýashylyǵy ıelerine arnalǵan.

— Saýalnama suraqtary jerdi paıdalaný, tehnıkanyń bolýy, maldy kútip-baptaý, ınfraqurylym, aýyl sharýashylyǵy ónimderin óndirý jáne ótkizý, sondaı-aq eńbek jaǵdaıyna qatysty bolmaq, — deıdi ol.

Odan bólek, sanaqqa qatysýshylar úshin saıtta keńes usynylǵan, saýalnamany toltyrýdyń egjeı-tegjeıi beıne nusqaýlyqpen túsindirilgen. Sondaı-aq SANAQ myrza chat-boty jumys isteıdi. 

— Eger aýylda respondenttiń kompıýteri nemese ınterneti bolmasa, ákimdikterdegi, aýdandyq statıstıka bólimdegi óz-ózine qyzmet kórsetý ortalyǵyna júginý múmkindigi qarastyrylǵan. El aýmaǵynda barlyǵy 2 684 oryn qamtamasyz etildi, — dep túsindirdi Ulttyq statıstıka bıýrosy basshysynyń orynbasary. 

Eske salaıyq, erteń elimizde aýyl sharýashylyǵy sanaǵy bastalady.