Internet izdep 5 shaqyrym júremiz: Túrkistan oblysynda turǵyndar jyldar boıy sheshilmegen máselege shaǵymdandy
TÚRKІSTAN. KAZINFORM — Arys qalasy Dermene aýyldyq okrýgine qarasty Sanaly aýylynyń turǵyndary ınternet baılanysynyń joqtyǵyna alańdap otyr. Aıtýlarynsha, bul másele ásirese mektep oqýshylaryna qıyndyq týǵyzyp otyr.
Turǵyndardyń sózinshe, aýylda uıaly baılanys pen ınternet turaqsyz. Úıdiń ishinde ǵana emes, aýla men kóshede de baılanys ustaý qıyn. Internetke qosylý úshin jergilikti turǵyndar bes shaqyrym qashyqtyqtaǵy kórshi aýylǵa barýǵa májbúr.
— Sóılese almaımyz, úıdiń ishinde baılanys múldem joq. Esik aldynda da ustamaıdy. Baılanys izdep, kóshe kezip ketemiz. Osylaı bolǵanyna qanshama jyl boldy. Internettiń bolmaýy bilim alýshylarǵa da keri áserin tıgizip otyr. Ásirese onlaın testileý men emtıhan kezinde oqýshylar qajetti platformalarǵa der kezinde kire almaı, qıyndyqqa tap bolady. Qalaǵa baryp, aqyly kýrstarǵa qatysýǵa májbúr. Oǵan báriniń birdeı jaǵdaıy jete bermeıdi. Byltyr ınternet máselesiniń kesirinen birqatar túlek granttan qaǵylyp, qazir aqyly bólimde oqyp júr, — deıdi aýyl bıi Altynbek Esmahanov.
Atalǵan máselege qatysty Arys qalasynyń ákimdigi Sanaly, Dermene jáne Shaǵyr eldimekenderinde ınternet sapasyn jaqsartý jumystary júrgizilip jatqanyn habarlady.
Ákimdik málimetinshe, atalǵan aýyldarǵa jańa bazalyq stantsııalar ornatylyp, turǵyndardy joǵary jyldamdyqty mobıldi ınternetpen qamtý josparlanǵan.
— Bul másele jyl basynda Arys qalasynyń ákimi Qaısar Mańqaraevtyń aýyl turǵyndarymen kezdesýinde kóterilgen. Turǵyndar eldimekenderdegi ınternet jyldamdyǵynyń tómen ekenin aıtyp, baılanysty jaqsartýdy suraǵan. Osydan keıin tıisti zerdeleý jumystary júrgizilip, máseleni sheshý joldary qarastyryldy. Nátıjesinde Arys qalasynyń ákimdigi, Túrkistan oblysynyń tsıfrlandyrý, memlekettik qyzmetter kórsetý jáne arhıvter basqarmasy men mobıldi baılanys operatorlary arasynda kelissózder júrgizilip, úsh eldimekenge bazalyq stantsııalar ornatý týraly sheshim qabyldandy, — delingen Arys qalasy ákimdiginiń jaýabynda.
Qazirgi ýaqytta bazalyq stantsııalardy «KCELL» AQ ornatyp jatyr. Qurylys-montaj jumystary qolǵa alynǵan. Josparǵa sáıkes, jumystar qazan aıynyń sońyna deıin aıaqtalýy tıis. Osydan keıin Sanaly, Dermene jáne Shaǵyr aýyldarynda mobıldi ınternet sapasyn jaqsartý kózdelip otyr.
Buǵan deıin Túrkistan oblysyndaǵy 32 eldimekenniń mobıldi ınternetpen qamtylmaǵanyn habarlaǵan edik. Bul eldimekenderde 4,5 myńnan astam adam turady.
