Internet tartamyz dep zań buzǵan: Qostanaıda kabelder májbúrli túrde alynady
QOSTANAI. KAZINFORM —Qostanaıda ınternet-provaıderlerdiń kóshe jaryǵy baǵandaryna ruqsatsyz ornatqan talshyqty-optıkalyq kabelderi májbúrli túrde demontajdalyp jatyr. Zańsyz qosylymdar qalalyq jelilerge qyzmet kórsetý kezinde qaýipsizdikke qater tóndiredi. Bul týraly Kazinform agenttiginiń tilshisi habarlady.
Qostanaı qalasynyń memlekettik aktıvter jáne satyp alý bóliminiń basshysy Álııa Segizbaeva bul máseleniń kóbine qurylys tyǵyz ornalasqan aýdandarda kezdesetinin aıtty. Onyń sózinshe, ınternet-provaıderler abonentterdi qosý úshin kóshe jaryǵy baǵandaryn zańsyz paıdalanady.
Osyǵan baılanysty qalada turǵyn úı-kommýnaldyq sharýashylyq bólimimen birlesip, zań talaptaryn buza otyryp tartylǵan kabelderdi májbúrli túrde alyp tastaý jumystary turaqty júrgizilip keledi.
Qazirgi ýaqytta Qostanaıda alty ınternet-provaıder resmı túrde jumys isteıdi. Alaıda olardyń sanaýlysy ǵana jeke jerasty kommýnıkatsııalaryna ıe. Kabeldik káriz jelileriniń basym bóligi «Qazaqtelekom» teńgeriminde.
Máseleni sheshý úshin qala ákiminiń orynbasary, «Qazaqtelekom» ókilderi men baılanys operatorlarynyń qatysýymen apta saıyn jıyndar ótkiziledi.
Qazir provaıderler áýe arqyly tartylǵan baılanys jelilerin birtindep jerasty kabeldik kárizderine aýystyryp jatyr.
Atap aıtqanda, L. Bedy, Pobedy, Q. Dónenbaeva, Ýzkokoleınaıa, Kıevskaıa kóshelerinde jáne Jastar saraıy aýdanynda jumystar aıaqtalýǵa jaqyn.
Budan bólek, Nazarbaev dańǵylyndaǵy «Tarlan» avtokesheniniń janynda jerasty kabeldik kárizin salý jumystary aıaqtalyp keledi. Joba tolyq bitken soń nysandy qalanyń kommýnaldyq menshigine berý josparlanǵan.
Bólimniń málimetinshe, sońǵy jyldary baılanys operatorlary 168 shaqyrymnan astam kabel jelisin jer astyna kóshirgen.
Sonymen qatar Qostanaıda jerasty kommýnıkatsııalaryn tsıfrlandyrý jumystary júrgizilip jatyr. Búginge deıin birinshi sanattaǵy 19 kóshe men ekinshi sanattaǵy 44 kósheniń jelileri tsıfrlandyrylǵan. Bul problemaly ýchaskelerdi anyqtap, baılanys jelilerin ornalastyrý tártibin retteýge múmkindik beredi.
Eske salaıyq, buǵan deıin Túrkistan oblysyndaǵy jedel tsıfrlandyrý jobasy aıasynda 212 aýylǵa ınternet tartylatyny habarlanǵan bolatyn.
