Internet sapasyn jetildire alsaq, damyǵan 20 memlekettiń qatarynan kórinemiz – Mýsın

ASTANA. QazAqparat – Telekommýnıkatsııa salasy boıynsha Internet sapasyn, ıaǵnı talshyqty optıkaly jelilerdi jetildirip, aldaǵy 2 jylda osy baǵytta nátıjeli jobalardy iske asyrsaq, álemniń 20 damyǵan memleketiniń qatarynan kórine alamyz.

Bul týraly búgini óziniń Facebook paraqshasynda QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın jazdy, dep habarlaıdy QazAqparat.

«Keshe «Astana» Halyqaralyq qarjy ortalyǵynda elimizdegi elektrondy úkimet salasyn damytý jaıyn talqyladyq. Іs-sharaǵa BUU-nyń tsıfrlandyrý salasyna jaýapty departamentiniń basshysy VINChENTsO AKÝARO myrza arnaıy kelip, elimizdegi tsıfrlandyrý salasyndaǵy atqarylyp jatqan jumystarǵa óz baǵasyn berdi.

Bıyl elimiz BUU reıtınginde elektrondyq úkimetti damytý boıynsha 28-oryndy ıelengen bolatyn. Al, osy reıtıngtiń ishinde «Onlaın-qyzmetterdiń sapa ındeksi» boıynsha 8 oryndamyz! BUU ókili Qazaqstan elektrondy úkimetti damytýda kóshbasshy elderdiń biri ekenin aıta kele, reıtıngte elimiz joǵary ball ıelengenin atap ótti»,-dep jazdy mınıstr.

Osy rette ol telekommýnıkatsııa salasy boıynsha Internet sapasyn, ıaǵnı talshyqty optıkaly jelilerdi jetildirip, aldaǵy 2 jylda osy baǵytta nátıjeli jobalar iske assa, álemniń damyǵan 20 memleketiniń qatarynan kórinýge bolatynyn jetkizdi.

«BUU baǵalaýy - elektrondy úkimettiń damý ındeksi boıynsha júrgiziletin eń bedeldi reıtıng ekendigin atap ótkim keledi. Ony qalyptastyrý aıasynda BUU sarapshylary elektrondyq qyzmetter men adamı kapıtaldyń damýyna basa mán beredi. Baǵalaýdan soń, táýelsiz sarapshylar derbes sheshim qabyldaıdy. Reıtıng sheńberinde BUU-ǵa qatysýshy 193 el baǵalanady»,-deıdi Baǵdat Mýsın.