Internet sapasyna qatysty shaǵym azaımaı otyr — Premer-mınıstr
ASTANA. KAZINFORM — Aqparattyq júıelerdiń úzdiksiz jumysy erekshe nazar aýdarýdy qajet etedi. Bul týraly Úkimet otyrysynda Premer-mınıstr Oljas Bektenov málim etti.
— Qazaqstannyń telekommýnıkatsııa salasy sońǵy bes jylda ornyqty ósim kórsetip keledi. Ekonomıkany tsıfrlyq transformatsııalaý baǵytyndaǵy barlyq reformanyń bastaýynda baılanys ınfraqurylymy turǵanyn aıta ketý kerek. Baılanys naryǵynda búginde básekelestik belsendi damyp keledi. Bul óz kezeginde operatorlardy jańa qyzmet túrlerin usynýǵa jáne olardyń sapasyn arttyrýǵa yntalandyryp otyr. Áleýmettik jobalar iske qosylyp jatyr. Olar tsıfrlyq keńistikte balalardy qorǵaýǵa jáne halyqtyń osal toptaryn qoldaýǵa baǵyttalǵan. Atalǵan jumysty odan ári jalǵastyrý qajet, — dedi Oljas Bektenov.
Sonymen qatar ol elimizdiń aýmaǵyn jyldamdyǵy joǵary ınternetpen jappaı qamtý arqyly ǵana tıisti nátıjege qol jetkizýge bolatynyn aıtty.
— Sonda ǵana Memleket basshysynyń jappaı tsıfrlandyrý jáne jasandy ıntellekt elementterin engizý týraly tapsyrmasyn tıimdi iske asyra alamyz. Turaqty ınternet — búginde ıgilikten bólek, halyqtyń kúndelikti ómiri men zamanaýı ekonomıkanyń mańyzdy qajettiligine aınaldy. Munymen qosa, jol boıynda mobıldi baılanys turaqsyz, aýyldy jerlerde ınternet óte baıaý, tipti qalalardyń ózinde aýqymdy is-sharalar barysynda ınternet sapasy nasharlap ketedi degen syńaıda aryz-shaǵymdar azaımaı otyr. Jasandy ıntellekt mınıstrligi osyndaı úlken sharalar kezinde baılanys jáne ınternet ınfraqurylymyna júktemeniń kúrt artýyna qatysty máseleni operatorlarmen birge muqııat pysyqtaýy qajet, — dedi Úkimet basshysy.
Onyń sózine qaraǵanda, aqparattyq júıelerdiń úzdiksiz jumysy erekshe nazardy qajet etedi. Bıyldyń ózinde úsh birdeı isten shyǵý jaǵdaıy tirkeldi. Derekterdi óńdeý ortalyqtarynyń jabdyqtary joǵary júktemeni kótere almady. Sondyqtan bul máseleler Jasandy ıntellekt jáne tsıfrlyq damý mınıstrliginiń turaqty baqylaýynda bolýǵa tıis.
Buǵan deıin habarlanǵandaı, 2027 jyldyń sońyna deıin halyqtyń 100 paıyzy ınternetpen qamtylady.