Internet sapasyn sóz qylyp otyrmyz, ózimizde baılanys joq — Ákim úkimet otyrysyna qosyla almady
ASTANA. KAZINFORM — Búgin baılanys sapasyn jaqsartý máselesi qaralǵan Úkimet otyrysynda Aqtóbe oblysynyń ákimi Ashat Shaharov 35 sekýnd boıy Úkimet úıimen baılanysa almady.
«Aldymyzda respýblıkalyq jáne oblystyq joldardyń boıyn baılanyspen qamtamasyz etý mindeti tur. Bul rette atalǵan jumys Aqtóbe, Atyraý oblystarynda nashar qarqynmen júrip jatyr. Osy óńirlerdi tyńdaımyz. Aqtóbe oblysy, Ashat Berleshuly sizderde baılanys dińgekterin ornatýǵa arnalǵan jobalyq qujattamany ázirleý qarqyny tómen. Ne deısiz?», — dep suraǵan edi Úkimet basshysy Oljas Bektenov óńir ákimi Ashat Shaharovtan.
Alaıda, Aqtóbe ákiminiń baılanysqa shyǵýy 35 sekýndqa tejeldi.
«Baılanys sapasy týraly áńgime qozǵap jatyrmyz, ózimizde baılanys joq», — dep keıidi Úkimet basshysy.
Azdaǵan úzilisten keıin baılanysqa qosylǵan Aqtóbe ákimi tehnıkalyq aqaý úshin keshirim surap, baılanys dińgekterin ornatýǵa arnalǵan jobalyq qujattardyń ázirlenip jatqanyn aıtty.
«Tamyz aıynda memlekettik saraptamadan ótkizip, barlyq tehnıkalyq qujattamany qalyptastyrýdy aıaqtaımyz. Kelesi jyldyń 1-jartyjyldyǵynda qurylys-montaj jumystaryn aıaqtap, paıdalanýǵa berýdi josparlap otyrmyz. Munan bólek, bıyl jergilikti bıýdjet esebinen 67,3 mln teńge bólinip, baılanys operatorlarymen 70 shaqyrymǵa jýyq respýblıkalyq jol mobıldi baılanyspen qamtylady. Jobalardy iske asyrý turaqty baqylaýda», — dedi ol.
