Internet resýrstarda talqyǵa túsip jatqan qujat - Til týraly zań jobasynyń sońǵy nusqasy emes - J. Qurmanǵalıeva
TANA. 9 tamyz. QazAqparat /Qanat Mámetqazyuly/ - Internet resýrstarda talqyǵa túsip jatqan qujat - Til týraly zań jobasynyń sońǵy nusqasy emes.
Bul týraly búgin Mádenıet mınıstrliginde ótken jıyn barysynda mınıstrliktiń jaýapty hatshysy Janna Qurmanǵalıeva málim etti.
«Sońǵy ýaqytta til týraly zań jobasyna qatysty kóptegen máseleler týyndap otyr. Toqtala ketetin jaıt, ınternet-resýrstardyń birinde ınternette silteme jasalyp júrgen zań jobasy Úkimet pen Parlamentke usynylatyn sońǵy nusqa emes. Bul barlyq memlekettik organdarǵa, qoǵamdyq birlestikterge joldanǵan zań jobasynyń qarapaıym jumys mátini ǵana. Bul mátin Ádilet mınıstrliginiń vedomstvoaralyq komıssııasynan da ótken joq», - dedi J. Qurmanǵalıeva.
Onyń aıtýynsha, zań jobasyn ázirleý boıynsha jumys tobynda qoǵamdyq birlestikter ókilderi, depýtattyq korpýs, sarapshylar qaýymdastyǵy qatysqan 40-shaqty adamnan turady. «Mádenıet mınıstrligi zań jobasyn ázirleýshi organ retinde jumys tobynyń basym kópshiligi qoldaǵan pikirmen kelispeı tura almaıdy. Osy turǵydan kelgende qoǵamda keńinen pikirtalas týdyrǵan máseleler de zań jobasynan kórinis tabatyn bolady. Atap aıtqanda, Tilder týraly qoldanystaǵy zańnamanyń 23-babynda mindetti túrde memlekettik tildi bilýi talap etiletin qyzmetter, sanattar men mamandyqtar tizbesine qatysty aıtystar órbigeni bar. Bunda negizinen azamattarǵa qyzmet kórsetý úshin bekitilgen mamandyqtar boıynsha memlekettik tildi eń tómengi, qajetti deńgeıde ıgerý týraly másele kóterilip otyr. Ázirshe, ondaı talap úsh sanatqa qatysty qarastyrylady. Bular: memlekettik qyzmetshiler, ulttyq kompanııa qyzmetkerleri jáne quqyq qorǵaý, áskerı qyzmet, sot prıstavtary sekildi sanatqa jatatyndar. ıAǵnı, bular negizinen óz jumystary barysynda kúndelikti azamattarmen baılanysyp turatyn sanattaǵy toptar bolyp tabylady», - deıdi jaýapty hatshy.
Esterińizge sala keteıik, 1997 jyly qabyldanǵan Til zańyna sáıkes memlekettik tildi mindetti túrde bilýi talap etiletin qyzmetkerler tizbesin bekitý jumysy 2001-2010 jyldarǵa arnalǵan memlekettik baǵdarlamada qamtylǵan edi. «ıAǵnı, 2002 jyly mundaı tizbe anyq jazylýy tıis edi. Alaıda, sol kezdegi tildik ahýaldy, obektıvti jaǵdaıdy eskere kele, bul normany engizý keıinge shegerildi», - dedi J. Qurmanǵalıeva.
