Internet-platformalar ózin-ózi jumyspen qamtyǵandar týraly aqparat joldaýǵa mindetteledi
ASTANA. KAZINFORM – Internet-platformalar Qazaqstandaǵy ózin-ózi jumyspen qamtyǵandar týraly aqparatty jiberýge mindetti bolady. Bul týraly Qarjy mınıstriniń buıryǵy jobasynda atalyp ótken.
«Kórsetilgen qyzmetter, oryndalǵan jumystar úshin aqy tóleý ınternet-platforma arqyly júrgizilmeıtin ınternet-platforma operatorlary salyq organdaryna ınternet-platformada tirkelgen, ınternet-platformany paıdalana otyryp, tapsyrys berýshilerge qyzmetter kórsetetin nemese tapsyrys berýshilerge jumystardy oryndaıtyn tulǵalar týraly málimetterdi memlekettik kirister organdaryna usyný qaǵıdalaryn, merzimin jáne nysanyn bekitý týraly» buıryǵy «Salyq kodeksiniń 14-babynyń úshinshi bóligine sáıkes ázirlendi.
Jobanyń maqsaty – kórsetiletin qyzmetter nemese oryndaıtyn jumystar úshin aqy tóleý júzege asyrylmaıtyn ınternet-platformalardy paıdalana otyryp, qyzmetti iske asyratyn jeke tulǵalardyń (onyń ishinde ózin-ózi jumyspen qamtyǵandardyń) jáne dara kásipkerlerdiń tabystarynyń tolyqtyǵy men ashyqtyǵyn qamtamasyz etý. Sondaı-aq qujat aıasynda ınternet-platformalardy oryndaýshylardyń salyq mindettemelerin jáne áleýmettik tólemder boıynsha mindettemelerdi oryndaý tártibin ońaılatý eskerilgen.
Buıryq jobasyn iske asyrýdan bolatyn nátıjesi:
– Internet-platformalar operatorlarynyń ınternet-platformalardy paıdalana otyryp qyzmetter kórsetetin nemese jumystardy oryndaıtyn tulǵalar týraly málimetterdi usyný tártibine, merzimderine jáne nysanyna biryńǵaı talaptardy aıqyndaý;
– Qyzmetti ınternet-platformalardy paıdalana otyryp júzege asyratyn jeke tulǵalardyń (onyń ishinde ózin-ózi jumyspen qamtyǵandardyń) jáne dara kásipkerlerdiń tabystaryna Memlekettik kirister organdary tarapynan baqylaýdyń tıimdiligin arttyrý;
– Jeke tulǵalardyń (onyń ishinde ózin-ózi jumyspen qamtyǵandardyń) jáne dara kásipkerlerdiń tabystaryn zańdastyrý jáne salyq zańnamasyn erikti túrde saqtaý deńgeıin arttyrý úshin quqyqtyq jaǵdaılar jasaý;
– Qyzmet kórsetý jáne jumystardy oryndaý salasynda adal básekelestikti damytýǵa járdemdesý.
Joba «Ashyq NQA» portalynda jarııalanyp, 18 tamyzǵa deıin qoǵamdyq talqylaýǵa usynylǵan.