Internet qoldanýshylary óz áreketine jaýap berýi kerek - mınıstr

ASTANA. QazAqparat - Internet qoldanýshylary óz áreketine jaýap berýi kerek dep oılaımyz. Bundaı pikirdi QR Aqparat jáne kommýnıkatsııalar mınıstri Dáýren Abaev málim etti, dep habarlaıdy QazAqparat.

«Taǵy bir ózekti másele ınternet-resýrstarda qoldanýshylardyń anonımdi pikir jazýyna tyıym salý. ıAǵnı, qoldanýshylardyń tirkelýin mindetteý kózdelip otyr. Qandaı da bir pikir jazý úshin adam eń aldymen tirkelýi kerek. Keıbir aqparat quraldary men qoǵamdyq uıymdar jasyryn pikir qaldyra almaý, erkin oı aıtýǵa núkte qoıady dep sanaıdy. Biraq bizdiń oıymyzsha,  pikir bildirýge bul eshqandaı kedergi jasamaıdy, qaıta qoldanýshynyń ishki tártibin kúsheıtedi», - dedi Dáýren Abaev óziniń Feısbýk paraqshasynda aqparat jáne kommýnıkatsııalar salasyna qatysty zań jobasyn túsindiretin vıdeojoldaýynda.

Onyń paıymynsha, osynyń barlyǵy eń aldymen azamattardyń múddesin qorǵaýdan týyndaıdy

«Qazir qarap otyrsaq, ultaralyq, dinaralyq janjalǵa shaqyrý, jala jabý, jeke basqa tıisý, alaıaqtyq jasaý oqıǵalary kóbeıip ketti. Sonyń saldarynan qarapaıym azamattar zardap shegýde. Sondaı bir pikirdiń kesirinen birin-birin tanymaıtyn adamdar janjaldasyp jatsa ne bolady? Sol sebepti de biz ınternet qoldanýshylary óz áreketine jaýap berýi kerek dep oılaımyz. Bul talap birte-birte ár adamnyń ishki fıltrine aınalýy qajet. Onyń ústine qazir muny jasaý tehnıkalyq turǵydan esh qıyn emes. Saıttar ony op-ońaı jasaı alady», - dedi mınıstr.