Internet kitapty almastyra almaıdy - N. Nazarbaev
ASTANA. 5 qyrkúıek. QazAqparat - Internet kitapty almastyra almaıdy. Búgin Astanadaǵy Nazarbaev ýnıversıtetinde «Qazaqstan bilim qoǵamy jolynda» atty taqyrypta dáris oqyǵan Memleket basshysy Nursultan Nazarbaev jastardy kitapty barynsha kóbirek oqýǵa shaqyrdy.
«Garvard ýnıversıtetiniń urandarynyń biri mynadaı: «Ómir boıyna oqý - endigi kúnge balama emes, ol mańyzdy qajettilik. Osyǵan baılanysty sizder alyp otyrǵan sapaly bilim bastapqy ıntellektýaldyq kapıtal ǵana. Sizderge úzdiksiz eńbek etip, bilimdi jetildirý, kásibılikti shyńdap, quzyrettilikti udaıy arttyrý kerek», - dedi Elbasy.
Osyǵan oraı, Memleket basshysy barlyq bilim alýshylardy belsendi túrde eńbek etýge, jan-jaqty bolyp, sportpen shuǵyldanýǵa, ónerge qyzyǵýǵa, ǵylymmen, tilderdi meńgerýmen aınalysýǵa shaqyrdy. Otandyq jáne álemdik ádebıetke tereń boılaýǵa úndedi. «Internet kitapty almastyra almaıdy. Jaqynda men «Kim kitapty kóp oqysa sol ınternette otyrǵandardy basqaratyn bolady» degendi oqydym. Buny da eskerińizder. Internetke kirip ketkenderdiń, kitap oqýy qalyp bara jatqandaı. Eń bastysy, barlyqtaryńyz laıyqty ómir, men ıgiliktiń bári, jańa belesterdi baǵyndyrý - tek eńbek arqyly keletinin bilińizder», - dedi N. Nazarbaev.
