Internet kıno naryǵynda ádildik ornata bastady – New York Film Academy grantyn alǵan mańǵystaýlyq

AQTAÝ. QazAqparat – Byltyr Aýstralııadaǵy qysqametrajdy fılmder baıqaýynda týyndysy úshinshi oryn alǵan qazaqstandyq stýdent pandemııa saldarynan AQSh-taǵy oqýyna jete almaı júr. Mańǵystaýlyq jas rejısser koronavırýs pandemııasy josparyn túbegeıli ózgertkenin aıtyp berdi, dep habarlaıdy QazAqparat tilshisi.

«Men Qazir L.Gýmılev atyndaǵy Eýrazııa ulttyq ýnıversıtetiniń úshinshi kýrs stýdentimin. NYFA (New York Film Academy – red.) grantyn 2019 jyldyń tamyz aıynda jeńip alǵanmyn. 2020 jyldyń mamyr aıynda Amerıkaǵa oqýǵa barýym kerek edi. Búkil álemde koronavırýs indeti órship, shekteýlerge baılanysty jete almaı júrmin. NYFA da qaıta-qaıta shaqyrý jiberip jatyr. 2022 jyldyń maýsym aıynda baramyn dep josparlap otyrmyn», - dep bastady ol áńgimesin.

Mańǵystaý óńiriniń týmasy Barlyq Muńalbaıuly óz ortasynyń nazaryn Aýstralııada alǵan júldesimen aýdarǵan bolatyn.

«MyRoodReel» dep atalatyn halyqaralyq qysqametrajdy fılmder baıqaýynda onyń aǵash sheberi týraly týyndysy úshinshi orynǵa ıe bolǵan edi.

Aqtaý qalasyndaǵy «Daryn» mektebiniń túlegi jastaıynan kıno salasyna áýes bolyp óskenin aıtady.

2019 jyly New York Film Academy uıymdastyrǵan baıqaýǵa qatysyp, grantty sol kezde utyp alǵan eken.

Ata-anasynyń qoldaýynyń arqasynda ǵana osyndaı jetistikke qol jetkizdim dep esepteıdi.

«Otbasymyzda bes adambyz. Ákem, anam, aǵam, men jáne qaryndasym bar. Ákem de, anam da - memlekettik qyzmetshiler. Ózimniń súıikti isim – osy fılm túsirý. Áke-sheshem únemi qoldap, fılm túsirýge múmkindiginshe qural-jabdyqtarymdy alyp berip otyrdy. Sonyń arqasynda armanyma senimdi qadam basyp kelemin», - deıdi jas rejısser.

Barlyq keıingi jyldary qysqametrajdy fılmder naryǵy You Tube alańynda jaqsy damyp kele jatqanyn aıtady.

«Kóbine oń tendentsııalardy baıqaımyn. Qazir AiTube arqyly qazaqsha platforma jaqsy damyp jatyr. Buryn kıno salasynda jetistikke jetý úshin túrli baspaldaqtardan ótý kerek bolatyn. Qazir júreginde oty bar kez kelgen áýesqoı kásipqoılarmen básekege túse alady. Internet bul turǵydan kıno naryǵyna ádildik ornatyp jatyr deýge bolady. Elimizde óte ádemi jerler kóp. Men osy múmkindikti paıdalanyp, ólkemizdiń tabıǵatyn nasıhattap, týrızmdi damytýǵa baǵyttalǵan fılmder túsirmekshimin. Jalpy bolashaqta fılm túsirýden kásipqoı maman bolýdy armandaımyn», - dedi mańǵystaýlyq jigit.