Internet-keńistikte destrýktıvti sıpattaǵy 2 971 materıal joıyldy
Internet-keńistikte destrýktıvti sıpattaǵy 97 myńnan astam silteme buǵattaldy. Bul jaıynda Májilis depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy Kazinform.
«Internet-keńistikte júıeli túrde dinı ekstremızmniń aldyn alý jáne qarsy nasıhattaý boıynsha jumystar júrgizilýde. Kontentti anyqtaý maqsatynda turaqty negizde ınternet-keńistikke monıtorıng júrgiziledi. Dinı taqyryptaǵy quqyqqa qaıshy jáne rezonanstyq materıaldarǵa den qoıýǵa kómektesetin «Kıbernadzor» aqparattyq júıesi jumys isteıdi. Jumys nátıjesinde 97 myńnan astam destrýktıvti sıpattaǵy silteme buǵattaldy. Qazaqstandyq qoldanýshylar úshin 248 materıalǵa qoljetimdilik buǵattalyp, 2 971 materıal joıyldy», - dep atap ótedi Úkimet basshysy jaýabynda.
Premer-Mınıstrdiń jaýabyna qosymsha berilgen anyqtamalyq materıalǵa qaraǵanda 20 myńnan astam adam áleýmettik jelilerdegi dástúrli emes dinı aǵymdardy nasıhattaý kózderinen bas tartty. 2023 jyldyń basynan beri jelilerde ekstremıstik materıaldardy taratqany úshin 70-ke jýyq adam ákimshilik jaýapqa tartyldy.
