Internet-kazınolarǵa 191 mlrd teńge aýdarýǵa kómektesken toptyń isi sotqa joldandy
ASTANA. KAZIFORM - Qarjylyq monıtorıng agenttigi sheteldik ınternet-kazınolardyń zańsyz qyzmetine járdemdesken topqa qatysty tergeýdi aıaqtady, dep habarlaıdy agenttiktiń baspasóz qyzmeti.
Tergeý málimetinshe, kúdiktiler óz baqylaýyndaǵy úsh kompanııanyń tólem júıesi arqyly sheteldik ınternet-kazınolardyń shottaryna aqsha aýdaryp otyrǵan. Bul júıege túrli bankterde ornatylǵan júzdegen tólem termınaly qosylǵan.
Olardyń qatarynda Nomadgames, Sultangames, Pinco, Pin-UP, Vavada, Mostbet jáne 1WIN ınternet-kazınolary bar.
Júrgizilgen tólem operatsııalarynyń jalpy kólemi 191 mlrd teńgege jetken. Al kúdiktiler alǵan komıssııalyq syıaqy 286 mln teńgeni quraǵan.
Aqshanyń naqty qaıda baǵyttalǵanyn jasyrý úshin zańdy tulǵalar men jeke kásipkerlerdiń derektemeleri paıdalanylǵan. Olardyń keıbiri óz atyna tólem termınaldary tirkelgeninen beıhabar bolǵan.
Atalǵan tulǵalardyń atyna ınternet arqyly tólem qabyldaıtyn termınaldar rásimdelgen. Jalǵan sharttar men arnaıy ázirlengen saıttardyń kómegimen aqsha aýdarymdary taýarlar men qyzmetterdiń tólemi retinde kórsetilgen.
Keıin qarajat sheteldik alýshylarǵa, sonyń ishinde krıptovalıýta arqyly jiberilgen.
-Qylmysty uıymdastyrǵan adam qamaýǵa alyndy. Sot sanktsııasymen tórt avtokólik pen 103 mln teńge qolma-qol aqshaǵa tyıym salyndy. Qylmystyq is sotqa joldandy. QR Qylmystyq-protsestik kodeksiniń 201-babyna sáıkes tergeýdiń ózge málimetteri jarııa etilmeıdi,-delingen habarlamada.
Osyǵan deıin Almatyda zańsyz onlaın-kazıno shemasy áshkerelengeni týraly jazdyq.
