Internet kartanyń kómegimen tyıym salynǵan dinı kontentti anyqtaýǵa bolady

QARAǴANDY. QazAqparat – Qaraǵandy oblysynda 15 konfessııanyń 324 dinı birlestigi jáne 44 sheteldik mıssıoner jumys isteıdi. Sońǵy úsh jylda óńirde destrýktıvti aǵymdy ustanýshylar sanynyń aıtarlyqtaı tómendegeni baıqalady, dep habarlaıdy QazAqparat tilshisi.

Tyıym salynǵan mazmundy anyqtaý úshin saraptamalyq ınternet karta arqyly áleýmettik jelilerge monıtorıng júrgiziledi.

«Bul júıe ınternette destrýktıvti aǵymdardyń materıaldaryn oqyp, taratatyn paıdalanýshylar sanyn azaıtýǵa kómektesti. 2020 jyly mundaı paıdalanýshylardyń sany 25 742-ge, al 2021 jyly – 17 653 adamǵa jetti», – dep habarlady din isteri basqarmasynyń basshysy Dýlat Halel.

Ótken jyly vedomstvo polıtsııa departamentimen birlesip QR ÁQBtK-niń 490-baby boıynsha 43 ákimshilik quqyq buzýshylyqty anyqtady.

Dintaný saraptamasynyń nátıjesi boıynsha 18 materıal úshin jalpy somasy 3 507 200 teńge ákimshilik aıyppul salyndy, 13 is toqtatyldy, 12 materıal sotqa jiberildi.

Aıta ketý kerek, áleýmettik jelilerde radıkaldy dinı ıdeologııa materıaldaryn ornalastyrýǵa, saraptamadan ótpegen dinı ádebıetterdi taratýǵa jáne zańsyz mıssıonerlik qyzmetke tyıym salynady.

Dinı ekstremızm men terrorızmge qarsy is-qımyl úshin basqarma ataýly-ońaltý jáne aqparattyq-aldyn alý jumystaryn júrgizedi.

Ótken jyly oblys boıynsha 3 880 aqparattyq-túsindirý is-sharasy ótkizildi, oǵan 227 myńǵa jýyq adam qatysty.

Óńirde memlekettik organdardyń jergilikti dinı qoǵamdastyqtarmen ózara is-qımyly úshin dinı birlestikterdiń baılanys jónindegi keńesi men klýby jumys isteıdi.

«Jalpy, óńirdegi dinı ahýal turaqty. Halyqtyń basym bóligi memleket damýynyń zaıyrlylyq qaǵıdattaryn ustanady», – deıdi Dýlat Halel.