Internet-dúkender qazaqstandyqtarǵa 7 mln teńgege jýyq aqshasyn qaıtaryp bergen

NUR-SULTAN. QazAqparat – Tutynýshylardyń quqyqtaryn qorǵaý komıtetiniń tóraǵasy Almaz Ábjapparovtyń aıtýynsha, eldegi ınternet-dúkender qazaqstandyqtarǵa 7 mln teńgege jýyq aqshasyn aıqaryp bergen, dep habarlaıdy QazAqparat tilshisi.

«2021 jyldyń alǵashqy jartyjyldyǵynda ınternet-dúkenderdiń qyzmetine 573 qazaqstandyq shaǵymdanǵan. Sol shaǵymdar negizinde tutynýshylarǵa shamamen 7 mln teńge qaıtaryldy. 2020 jyldyń birinshi jartyjyldyǵynda 98 adam shaǵymdanǵan bolatyn. Ol kezde qaıtarylǵan aqshanyń kólemi 1,4 mln teńge edi. Azamattardyń bizdiń komıtetke aryz jazýyna túrli jaıttar sebep bolady. Taýardy aıyrbastaýdan nemese qaıtarýdan bas tartý (175 ótinish), sapasyz taýar usyný (118 ótinish), ózge máseleler boıynsha (280 ótinish) shaǵymdar túsedi», - dedi Almaz Ábjapparov Saýda jáne ıntegratsııa mınıstrliginiń alqa májilisinde.

Atalmysh sharada Almas Abjapparov jalpy komıtetke jyl basynan beri tutynýshylardan 8 myńǵa jýyq shaǵym túskenin aıtqan bolatyn.

Bul byltyrǵy kórsetkishpen salystyrǵanda 144 paıyz kóp.

Vedomstvo ókili tutynýshylardyń quqyqtaryn qorǵaý salasyndaǵy problemalar jańa zańnamalyq ózgerister engizýdi talap etetinin atap ótti. Osyǵan baılanysty 2021 jyly Komıtet Zańǵa túzetýlerdiń 2-paketin ázirleýge kiristi. Komıtet ázirlegen joba tujyrymdamasy 2021 jylǵy 25 maýsymda tutynýshylardyń quqyqtaryn qorǵaý jónindegi vedomstvoaralyq keńestiń birinshi otyrysynda talqylandy, al 30 maýsymda tujyrymdama Ashyq NQA portalynda talqylaý úshin ornalastyrylǵan.