Internet-dúkende jumys istegen: Petropavldyq áıelden 300 gramm esirtki tabyldy
Soltústik Qazaqstan oblysy Polıtsııa departamenti baspasóz qyzmetiniń málimetinshe, oblystyq prokýratýranyń úılestirýimen bolǵan jedel-izdestirý is-sharasy barysynda 36 jastaǵy Petropavl turǵyny qolǵa tústi. Áıel ınternet-dúkenderdiń birinde jumys istep, sıntetıkalyq esirtkini býyp-túıýmen jáne taratýmen aınalysqan degen kúdikke ilindi.
Ustalǵannyń turǵylyqty jerin tintý kezinde 2 polımerli ydys jáne satýǵa daıyndalǵan ishinde túıirshikti zaty bar 109 polımerlik túıinshek, elektrondy tarazy, «zıplok» paketteri jáne esirtki satýshylardyń basqa da qural-jabdyqtary tárkilendi.
Saraptama qorytyndysyna sáıkes, alynǵan zattardyń ishinde salmaǵy 155 gramnan asatyn α-PVP sıntetıkalyq esirtkisi jáne salmaǵy 129 gramǵa jýyq mefedron bolǵan. Budan basqa tárkilengen zattyń arasynda 50 gramm gashısh boldy.
«Ustalǵan áıel qazirgi ýaqytta qamaýda otyr. Atalǵan fakti QR QK-niń 297-babynyń 3-bóligi - «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha sotqa deıingi tergep-tekserýlerdiń biryńǵaı tiziliminde tirkeldi.
Baptyń sanktsııasyna sáıkes, esirtki zattaryn asa iri mólsherde ótkizý maqsatynda aınalysqany úshin 10 jyldan 15 jylǵa deıingi merzimge bas bostandyǵynan aıyrý jazasy kózdelgen», – deıdi SQO PD esirtki qylmysyna qarsy is-qımyl basqarmasynyń bastyǵy Ivan Terzıdı.