Internet arqyly jurttyń aqshasyn jymqyrǵan Petropavl turǵyny ustaldy

PETROPAVL. QazAqparat – Petropavl qalasynyń turǵyny ınternette «Býrabaıdyń shıpajaıyna ornalastyramyn» dep jalǵan habarlandyrý berip, aldyn ala tólem jasatý arqyly jurtty aldaǵan, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń málimetinshe, ınternet-alaıaqtar aldaýdyń jańa túrine kóshken. Olar taýarlar men qyzmetter týraly jalǵan habarlandyrýlar ornalastyryp, aldyn ala tólem suraıdy. Alaıaqtar halyqtyń maýsymdyq qajettilikterin paıdalanǵan.

«Jarnamalyq habarlandyrýlar saıtynda Býrabaı shıpajaıynda demalý úshin úıdi brondaý týraly habarlandyrý ornalastyrylǵan. Klıentterge 15 myń teńge kóleminde aldyn ala tólem jasaý qajet ekeni aıtylǵan. Nur-Sultan qalasynyń turǵyny habarlandyrýda kórsetilgen Qiwi-ámııanǵa aqsha jibergen. Óziniń aldanǵanyn tek «fırmaǵa» qońyraý shalyp, kórsetilgen mekenjaıǵa baratyn baǵytty naqtylamaq bolǵanda túsingen. San soǵyp qalǵan áıel polıtsııaǵa habarlasty. Alaıaqtyń Petropavl qalasynda turatyndyǵy anyqtaldy», - deıdi baspasóz qyzmetkerleri.

SQO PD Krımınaldyq polıtsııa basqarmasynyń qyzmetkerleri jedel-izdestirý is-sharalary barysynda kúdiktini anyqtady. Ol oblys ortalyǵynda turatyn 41 jastaǵy áıel bolyp shyqty. Atalǵan fakti QR Qylmystyq Kodeksiniń 190-babynyń 2-bóligi boıynsha Sotqa deıingi tergep-tekserýdiń biryńǵaı tizilimine engizildi. Tártip saqshylary qala turǵynynyń osyǵan uqsas basqa da qylmystarǵa qatystylyǵyn anyqtaýda.

«Kúmándi kórinetin habarlandyrýlarǵa nazar aýdarmaǵan jón. Internette avtobólshekter, turmystyq tehnıka, baspana da satylýy múmkin. Alaıaqtar keı kezderi psıhologııalyq ádisterdi de qoldanady. Merzimi aıaqtalýǵa jaqyn aktsııalar týraly aıtyp, klıentke tez arada sheshim qabyldaýdy usynady.

Jaqynda oblysta ınternet-alaıaqtyqtyń jańa túri paıda bolýy múmkin. Bul elimizdiń basqa óńirlerinde qoldanyla bastady. Qaskóı áleýmettik jelilerde medıtsınalyq kómekke zárý, shuǵyl operatsııany qajet etetin azamattar týraly habarlandyrýlardy izdeıdi. Naýqastyń jaqyndaryna habarlasyp, dárigerlermen til tabysa alatynyn, ota jasaýdy uıymdastyrýda kómektesýge daıyn ekenin aıtady. Keıin emdeý kýrsyn uıymdastyrý úshin dárigerlermen sóılesýge ketkenin aıtyp, medıtsınalyq em-dom sharalaryn tóleý úshin qajetti somanyń bir bóligin jiberýdi suraıdy. Aqsha qolyna tıgen soń, baılanysqa shyǵýdy qoıady», - deıdi SQO PD Krımınaldyq polıtsııa basqarmasy bastyǵynyń mindetin atqarýshy Marat Jumalıev.

SQO polıtseıleri jyl basynan barlyǵy ınternet-alaıaqtyqtyń 30 faktisin ashty.