Internet arqyly jasalǵan 8 qylmysqa kúdikti Almaty turǵyny ustaldy
SQO Polıtsııa departamenti baspasóz qyzmetiniń málimetinshe, ınternet alaıaqtyqty kásip etken er adam belgili habarlandyrý saıtyn paıdalanǵan. Platformada qymbat kólikterge arnalǵan qosalqy bólshekterdi tómen baǵamen «usynǵan».
Petropavl qalasynyń polıtsııa basqarmasyna ınternet alaıaqtyq faktisi boıynsha birneshe aryz kelip tústi.
Jábirlenýshilerdiń aıtýynsha, habarlandyrý saıtynda belgisiz er adam ózin astanalyq satýshymyn dep tanystyryp, sheteldik kóliktiń qosalqy bólshekterin usynǵan. Qyzyǵýshylyq tanytqan adamdardan aldyn ala tólem alǵan soń, baılanysqa shyqpaı qoıǵan. Óńir polıtseıleri jedel-izdestirý is-sharalaryn ótkizdi, nátıjesinde Almatyǵa issapar barysynda 32 jastaǵy er adam anyqtalyp, ustaldy. Ol ınternet alaıaqtyqtyń 8 epızodyn jasaǵanyn moıyndady. Kúdikti aqshany basqa bireýdiń atyna tirkelgen kartaǵa jibertkizip otyrǵan.
Atalǵan faktiler «Alaıaqtyq» boıynsha Sotqa deıingi tergep-tekserýdiń biryńǵaı tizilimine engizildi. Ustalǵan adam qamaýǵa alyndy, tergeý bastaldy, er adamnyń osyǵan uqsas basqa da qylmystarǵa qatysy bar-joǵy tekseriledi.
Jeti aıda SQO polıtseıleri 637 habarlandyrýdy tekserip, onyń 61-in saıttardyń ákimshisi arqyly buǵattady. Jyl basynan oblysta 300-den astam ınternet alaıaqtyq faktisi tirkeldi.