Internet arqyly shóp satyp almaq bolǵan aýyl turǵyny aqshasynan aıyryldy
SQO polıtsııa departamenti baspasóz qyzmetiniń málimetinshe, polıtsııaǵa Mamlıýt aýdanyndaǵy aýyldyń biriniń turǵyny júginip, jarnama saıtynda aldanyp qalǵanyn aıtqan. Aıtýynsha, ol habarlandyrý arqyly 58 myńǵa shóp teńderine tapsyrys bergen. Bir orama shópti 7 myń teńgege almaq bolǵan. Alaıda «satýshy» aqsha qolyna tıisimen, ne qońyraýǵa ne habarlamarǵa jaýap bermegen. Osylaısha jábirlenýshi áıel aldanǵanyn túsingen.
Mamlıýt aýdany polıtsııa bóliminiń bastyǵy Serik Áljanovtyń aıtýynsha, jem-shópke suranystyń artýyn alaıaqtar da paıdalanǵan. Krımınaldyq polıtsııa bólimshesiniń qyzmetkerleri jedel-izdestirý is-sharasyn ótkizdi. Qostanaı oblysyna issapar barysynda ınternet-alaıaqtyqqa barǵan kúdikti anyqtalyp, ustaldy. Ol 21 jastaǵy Rýdnyı qalasynyń turǵyny bolyp shyqty. Jas jigit Mamıýtkaǵa jetkizildi, qazirgi ýaqytta tergeý áreketteri júrgizilip jatyr. Atalǵan fakti QR QK 190-baby 2-bóligi «alaıaqtyq» boıynsha Sotqa deıingi tergep-tekserýlerdiń biryńǵaı tizilimine engizildi. Onyń osyndaı oqıǵa jelisi boıynsha Qyzyljar aýdanynyń turǵyny men Petropavldyń eki turǵyny zardap shekken ınternet-alaıaqtyqqa qatysy bar-joǵy tekserilip jatyr.
«Alaıaqtar maýsymdyq suranysqa ıe taýarlardy jeleý etip, únemi jańa aıla men oqıǵa oılap tabady. Halyqty saq bolýǵa, taýar jáne satýshy boıynsha jurttyń pikirin oqyp, tanysyp jáne olardan satatyn taýarlarynyń beınesholýyn jiberýin talap etýdi suraımyz», - deıdi Serik Áljanov.