Internet arqyly satyp alynǵan temir jol bıletin úıge jetkizip berý úshin 350 teńge tóleıtin bolasyz
ASTANA. 8 sáýir. QazAqparat /Gúlmıra Álıakparova/ - Astana men Almaty qalalarynda ınternet arqyly satyp alynǵan temir jol bıletterin úıge jetkizip berý qyzmeti 350 teńge kóleminde bekitildi.
Bul týraly «Jolashýylar tasymaly» AQ-nyń baspasóz qyzmetinen málim etti.
«Jolaýshylar tasymaly» AQ Basqarmasynyń 2011 jylǵy 30 naýryzyndaǵy sheshimimen aǵymdaǵy jyldyń 1 sáýirinen bastap Astana men Almaty qalalarynda ınternet arqyly satyp alynǵan temir jol bıletterin úıge jetkizip berý qyzmeti qosylǵan qun salyǵyn qosa eseptegende 350 teńge kóleminde bekitildi», - delingen habarlamada.
Baspasóz qyzmetinen anyqtaǵandaı, bul - qala aýmaǵyndaǵy bir jetkizilimniń baǵasy jáne oǵan satyp alynǵan bıletterdiń sany qosymsha esepke alynbaıdy.
Eske salaıyq, búginde memleketishilik baǵyttardaǵy 48 poıyzǵa, TMD elderine qatynaıtyn 25 jáne barlyq qala mańy poıyzdaryna bıletterdi ınternet arqyly, naqty aıtqanda «Qazaqstan temir joly» UK» AQ-nyń www.pcentre.kz saıtynan satyp alýǵa bolady. Internet arqyly resimdelgen bıletti sondaı-aq vokzaldyń bılet kassalarynan jáne temir jol bıletterin satýmen aınalysatyn jekemenshik kassalardan, ózdi-ózine qyzmet etý transaktsııalyq termınaldardan basyp shyǵarýǵa bolady.
