Internet arqyly ótetin halyqaralyq shahmat jarysyna J.Ábdimáliktiń shahmat akademııasy da qatysýy múmkin
ALMATY. QazAqparat - Búgin Almatyda Jansaıa Ábdimáliktiń shahmat Akademııasy fılıalynyń ashylý rásimine qatysqan, shahmattan álemniń 12-shi chempıony, halyqaralyq grossmeıster Anatolıı Karpov «QazAqparat» tilshisine bergen suhbatynda bıyl 2 sáýirde A.Karpovtyń shahmat mektepteriniń ınternet boıynsha tuńǵysh ret halyqaralyq týrnıri ótkiziletindigin málimdedi.
«Bul týrnırge tek meniń shahmat mektepterim ǵana emes, menimen baılanysy bar basqa da mektepter qatysa alady. Qazir Reseıdiń 40 shaqty óńiri men álemniń 32 elinde meniń shahmat mektepterim jumys isteıdi. Mysaly, AQSh-ta, Germanııada úsh mektebim, Frantsııada eki mektebim bar. Sondyqtan, qazaqstandyqtar da shahmat boıynsha osy ǵalamtorlyq baǵdarlamamyzdy basshylyqqa alýlaryna ábden bolady», - dedi A. Karpov.
Sonymen qatar, ol Qazaqstandaǵy túzetý kolonııalaryn da shahmattan óz atynan ǵalamtor boıynsha ótkiziletin halyqaralyq týrnırge qatysýǵa shaqyrdy.
«Men aldaǵy 1 sáýirde AQSh-tyń Chıkago qalasynda bolamyn. Sol jerde on-laın rejiminde shahmattan ınternet boıynsha AQSh pen Reseıdiń qamaýdaǵy adamdary arasynda Halyqaralyq joldastyq match ótkizemin. Nege Chıkago? Óıtkeni, munda 16 myń adamdyq alyp túrme ornalasqan. Munda 6 jyldan beri qamalýshylar arasynda shahmat qarqyndy damytylyp keledi. Al Reseıde bul baǵdarlama meniń bastamammen 17 jyl buryn qolǵa alynǵan. Sol úshin Qazaqstandaǵy túzetý kolonııalaryn osy baǵdarlamaǵa qatysýǵa shaqyramyn», - dedi A. Karpov.
Óz kezeginde Jansaıanyń anasy, Jansaıa Ábdimáliktiń shahmat akademııasy fılıalynyń oqý isi boıynsha dırektory Alma Áshirova qazir Anatolıı Karpovtyń shahmat mektepteriniń ınternet boıynsha alǵashqy halyqaralyq týrnırine akademııanyń da qatysý múmkindigi qarastyrylyp jatqandyǵyn jetkizdi.
Aıta ketelik, týrnır jeńimpazdaryna arnaıy syılyqtar tabys etiledi.
